Un tema cu semper ta keda presenta bao di nos muchanan y hobenan ta termento. No solamente na Aruba, pero tambe Internacionalmente esaki ta un comportacion cu ta keda presenta bao di mucha y hoben. E mucha y hoben ta den desaroyo, ta conociendo ken e ta y ken e no kier ta, ta siña deal cu su emocion y sentimentonan, ta scucha, mira y copia conducta di adultonan rond di dje, ta encontra retonan y no sa con pa deal cu nan, y tur esakinan ta zorg pa e tambe tin comportacionan menos desea.
E comportacion di termento por zorg pa consecuencianan hopi negativo pa e persona cu ta pasa den termento. Di otro banda, esun cu ta ter ta esun cu tin un problema y tambe mester ser yuda. Banda di e consecuencianan negativo pa e persona cu ta pasa den termento y esun cu ta ter, termento ta influencia e ambiente di siñamento den klas y scol. Na su turno esaki por stroba e muchanan den e scol di desaroya nan talentonan y habilidadnan.
Termento semper tawata un di e motibonan principal pa contacto di mucha y hoben cu 131 Aruba, y termento semper a aparece den e top 5 di motibo pa contacto cu 131 Aruba. Pa e motibo aki 131 Aruba a start na Aruba na ana 2012 cu e proyecto Prevencion di Termento na Scol. Na 2012 e proyecto a start den forma di un proyecto piloto den 8 scol basico akinan nan Aruba. Prome cu a cuminsa cu implementacion di e proyecto na Aruba, CBS a midi e comportacion di termento den e 8 scolnan basico. E estudio a mustra cu 56.5% di mucha a bisa e tempo ey cu nan ta pasa door di termento. Despues di e estudio 131 Aruba a cuminsa implementa e proyecto den e scolnan. Na momento cu a caba cu implementacion,CBS a bolbe drenta e scolnan pa studia si por tin cambio di conducta. E estudio di CBS ta mustra cu despues di a ricibi e proyecto di 131 Aruba, e comportacion di termento a conoce un reduccion di 21%. Locual ta mustra cu e proyecto di 131 Aruba ta efectivo.
Na 2016 131 Aruba a cuminsa cu un serie di training na docentenan di scol pa asina nan por haya conocemento ariba e tema, siña implementa e proyecto, traha ariba nan protocol pa preveni termento y a ricibi tur material di e proyecto gratis. Te cu awor aki alrededor di 34 scol preparatorio, basico y secundario na Aruba a ricibi e training aki. Tambe un scol basico di e isla di Bonairu a ricibi e training aki na 2017 y tur profesional di e sector di enseñansa y social di e isla di Saba a ricibi e training akin a 2023, y cual a certifica nan pa por duna Prevencion di Termento na Scol na e alumnonan.
Pa SKOA e ta di sumo importancia pa su scolnan ta safe, y pa asina aki e alumnonan di scolnan di SKOA por desaroya nan talentonan y habilidadnan den un cura di scol cu ta brinda e seguridad aki. Den cuadro di sigui, SKOA a acerca 131 Aruba pa yuda SKOA fortalece e ambiente sigur den cura di scol. For di Juni 2026 te cu juni 2029, un total di 31 scol di SKOA lo ricibi training for di 131 Aruba tocante e tema di termento.
Ariba 19 di October ultimo e docentenan di St. Anna School, Colegio Frere Bonifacius y Colegio Bon Bini a participa na e training di Prevencion di Termento nan Scol. Durante e training nan a ricibi conocemento tocante termento, nan a cuminsa traha ariba nan protocol pa perveni y actua contra di termento y a siña con pa implementa e proyecto.
Despues di e training e scolnan ariba menciona ta keda ricibi sosten di 131 Aruba pa cu implementacion di Prevencion di Termento nan Scol den nan scol.
E proyecto Prevencion di Termento na Socl por ser implementa danki na sosten di Setar N.V, Aruba Airport Authority N.V., The Salamander Group, Web Aruba N.V, Aruba Hotel and Tourism Association y ASTEC N.V..
Pa mas informacion tocante di Prevencion di Termento por tuma contacto cu 131 Aruba via nos website: 131.aw, facebook: https://www.facebook.com/aruba.131/, email: 131aruba@gmail.com of telefon 5886138/ 5884011.
