Parlamentario di AVP, Clifford Heyliger, ta sostene cu e debate tocante salario minimo y pension di biehez mester cuminsa cu un pregunta fundamental: e entradanan aki ta suficiente pa cubri e necesidadnan basico di un persona? Segun Heyliger, preocupacion tocante e costo di un aumento mester wordo evalua hunto cu e costo social y economico di laga un parti di comunidad sigui biba cu un entrada insuficiente.
“Esnan cu ta evalua e tema for di un posicion di un bon salario y bon condicionnan di trabou mester tene cuenta cu e realidad di esnan cu no tin e mesun oportunidadnan. Pa un persona cu salario minimo, huur, awa, coriente, transport, cuminda, paña y gastonan di salud no ta un discusion teorico. Ta cuenta cu mester paga tur luna,” Heyliger a expresa.
E parlamentario a señala cu tin trahadonan cu ta busca un segundo trabou, haci trabounan adicional of bende cuminda pa complementa nan entrada. Pa Heyliger, e esfuerzonan aki ta mustra e boluntad di hende pa sali dilanti, pero tambe e presion cu nan ta enfrenta pa cubri nan necesidadnan.
Prevencion di Pobresa
Heyliger a enfatisa cu salario minimo y pension di biehez tin un funcion esencial den proteccion social. Den su opinion, ora e entradanan aki keda structuralmente bou di loke ta necesario pa subsisti, nan no ta cumpli suficientemente cu e meta di proteha hende contra pobresa.
“Si nos reconoce cu un entrada no ta suficiente pa cubri necesidadnan basico, nos no por acepta e situacion como si ta algo normal. E diferencia ta wordo paga door di e persona, su famia of, eventualmente, door di comunidad,” el a declara.
E parlamentario a adverti cu dificultad financiero prolonga por empeora e vulnerabilidad social y aumenta e necesidad di sosten publico. P’esey, e ta considera cu prevencion di pobresa mester forma parti integral di e evaluacion economico.
“E prijskaartje no ta disparce pasobra nos pospone un decision. Nos por atende e problema awe, of enfrenta e consecuencianan y un cuenta mas grandi den futuro.”
Necesidadnan di trahado y realidad economico
Heyliger a relaciona su argumento cu e enfoke di Organisacion Internacional di Trabou, ILO, cu ta pone enfasis riba necesidadnan di trahadonan y nan famianan, costo di bida y factornan economico den e determinacion di salario minimo. E enfoke aki ta inclui tambe productividad, desaroyo economico y empleo.
Como referencia internacional, el a menciona Hulanda, unda e pension estatal AOW ta vincula na salario minimo y e sistema di asistencia social ta contempla un minimo social. Pa Heyliger, e les relevante pa Aruba ta cu politica di ingreso y proteccion social mester wordo considera den relacion cu otro y cu e necesidadnan di bida.
Prosperidad mester wordo sinti den cas
Segun Heyliger, e desaroyo economico di Aruba mester traduci den un mihor calidad di bida pa un parti mas amplio di poblacion. E ta argumenta cu e prosperidad genera no a wordo sinti suficientemente den e poder di compra di hopi famia.
E preocupacion, segun e parlamentario, ta bay mas leu cu salario minimo. E ta considera cu e nivel di salario den diferente profesion tambe merece atencion, entre otro pa haci Aruba mas atractivo pa hobennan cu ta studia den exterior y ta evalua unda pa desaroya nan carera.
“Nos kier pa nos yiunan regresa y contribui na Aruba. E ora ey nos mester wak tambe si e salario y oportunidadnan cu nos ta ofrece ta permiti nan construi un futuro aki,” Heyliger a expresa.
Analisa y Prepara
Heyliger a indica cu gobierno a encarga un analisis pa cuantifica e costo di e cambio y identifica accionnan cu por mitiga efectonan negativo. Pa e parlamentario, e trabou aki ta importante pa por tuma decisionnan informa y prepara un implementacion responsabel.
E ta enfatisa cu e impacto riba empresa y empleo merece atencion serio, hunto cu e necesidad di mehora e posicion di trahadonan y pensionadonan. Segun Heyliger, e analisis mester yuda determina con pa avansa y cua medida di acompañamento ta necesario.
“Mi pregunta na esnan cu tin un otro opinion ta cla: bo ta considera e pension di biehez actual adecua? Bo ta considera salario minimo suficiente pa cubri necesidadnan basico? Si e contesta ta no, nos tin e responsabilidad pa contribui na un solucion,” Heyliger a conclui.
