Relaciona cu e situacion di Horacio Oduber Hospital (HOH), Organo Ehecutivo (OE) di AZV ta informa cu Ministerio di Salud Publico, HOH y OE AZV ta na mesa pa algun luna caba pa atende e situacion cu a surgi.
Como parti di e atencion aki, OE AZV desde februari di e aña aki a pone recursonan adicional disponibel den forma di voorschotten, pa asina HOH tin mas espacio di liquidez pa por atende e retonan actual. E voorschotten aki -of miho bisa e fondonan di pueblo di Aruba aki- no ta sin condicion. Mirando e tarea importante di OE AZV pa salvaguardia y monitoria tur momento con e placa di e asegurado ta keda uza, OE AZV ta stipula condicionnan cu mester cumpli cu ne.
E condicionnan aki ta pa sigura cu e fondonan publico ta wordo uza debidamente y cu continuidad, accesibilidad y calidad di cuido den hospital ta garantisa.
Actualmente partidonan ta pendiente di resultadonan di e estudionan cu hunto nos ta haciendo. E estudionan aki ta necesario pa por yega na un solucion structural y duradero pa e situacion actual pero tambe pa futuro. Un biaha mas, awe en espera di e resultadonan, OE AZV a otorga HOH Afl. 15 miyon adicional di voorschot. Cu esaki e suma di voorschotten adicional pa HOH na 2026 a yega Afl. 31 miyon.
Cu e pasonan aki, tanto Ministerio di Salud Publico como OE AZV ta mustrando un compromiso pa garantisa accesibilidad y continuidad di cuido specialisa den hospital. Nos tin confiansa cu, mediante dialogo constructivo, colaboracion y transparencia entre partidonan, lo yega na un solucion duradero pa e situacion, na interes general di nos aseguradonan.
