Pa nos ta hende berdaderamente responsabel tin un palabra cu mester bira un realidad y un potencial den nos bida y esaki ta para scirbi den Mateo 7:24-25.
Bisando: Pesey ken cu tende e palabranan aki di Mi, y haci nan, lo wordo compara, cu un homber sabi, cu a traha su cas riba baranca, Y awacero a cay, diluvio a bin, y bientonan a supla,y a suta duro contra e cas ey,y tog e no a cay, pasobra e tabata funda riba baranca.
Papia hopi tin biaha ta resulta cu hende ta, tende e palabra y no haci nada , ta falta di responsabilidad,ta rebeldia,nos mester wak masha bon pa nos lanta yuinan responsabel, cu karakter, pasobra sino ta asina, nos lo tin hopi dolor di cabes, pasobra e mucha ta tende so, pero e no ta haci nada.
Pa nos lanta yuinan firme nos mester duna nan encargo for di chiki, pa nan sinja carga responsabilidad.
Ora un mayor duna un mucha un cacho,mata of un parha pa e cuida esey ta yena e mucha na prome lugar cu amor y na di dos lugar e ta bira responsabel, pa locual cu e tin.
Pasobra pa falta di responsabilidad na cas, muchanan ta subi caya y bisa cu no tin nada di haci na cas,pasobra nan mayornan a bira asina moderno cu dishwasher, cu stofzuiger, y cu malcriansa cu e mucha no tin ningun encargo pa e cumpli cune,
Asina e ta bin ta creciendo iresponsabel, pasobra su mayor no a encarge cu responsabilidad, pesey bo ta hanja bo cu awendia mucha muher kier casa, pero e no por cushina nada, e tin mas bista pa moda, hunja , cu su cabey, y cu su curpa cu e tin cu su responsabilidad den cas.
Igualmente ta pasa cu mucha homber, pasobra trabao di cas no ta pa hende muher so, esey no ta para scirbi ningun caminda,tur hende den cas mester hanja un encargo.
Y notable pa e generacion di awor cu tur cos ta birando mas caro, esey ta nifica cu mas cos bo mes por haci, mas placa ta keda den bo man.
Tene cuenta solamente cuanto pa drecha pia di carson awendia, cuanto pa pone un zipper nobo, cuanto pa zom un bisti cu a los.
Cada rato hende ta cumpra panja nobo , pasobra nan no por drecha esun bieu y ta sconde tras di e frase famoso di ultimo tempo” Ta tempo mi no tin”, pero esey no ta berdad, reconoce cu ta por bo no por, y cuminsa busca un manera pa sinja.
E palabra di Dios ta sinja nos pa nos ta responsabel y pasa responsabilidad pa nos yuinan. (Salmo 78:4).
Pasobra con por ta posibel pa nos yuinan kere den Dios y depende riba Dios, si nos como mayor no conta nan di e grandesa di Senjor?
Con por ta posibel pa nos yuinan, lanta desente cu bon karakter, cu respet y integridad, si nos no ta cria nos yuinan, con nos por exigi bon conducta, si nunca nos no a demostra amor, guia, respet y cu nos tey fisicamente den cas pa nos famia, pasobra tur hende por grita riba telefon, of hasta cu video call” mi yiu mi tey pa bo” pero masha poco biaha bo tey na cas.
Tur loke boso ta haci, haci boso trabao di curason, como pa Senjor y no pa hende.(Colosensenan 3:23).
Den tur cos cu nos ta haci nos mester ta hende fiel, confiabel y responsabel, pesey Dios tambe ta yama cada mayor pa nan ta reponsabel.
Sinceramente, Pastor Marcel Balootje.
