Salbacion ta un decision personal, cu tur hende mester tuma, pasobra e palabra di Dios ta bisa:
Cu esun cu kere lo ta salba, pero esun cu no kere ta condena caba,pasobra e no a kere den e Yiu unigenito di Dios. ( Juan 3:16-18).
Mescos cu e palabra ta bisa den Filipensenan 2 :10-11 : Cu pa e nomber di Hesus tur rudia mester dobla ,di esnan cu ta den cielo,y riba tera, y bao di tera. Y cu tur lenga mester confesa cu Hesus Cristo ta Senjor pa Gloria di Dios Tata.
No ta bay asunto di cu hende kier of no kier, pero si e decision aki no wordo tuma, nos lo no drenta cielo, nos lo biba un bida sin ningun clase di speransa cu na final ta termina den perdicion.
Dios a splica esaki hopi cla den Juan 3;36 bisando; Esun cu kere den e Yiu tin bida eterno, ma esun cu no obedece e Yiu lo no mira bida, ma e furia di Dios ta keda riba dje.
Hesus a bisa den Juan 8:12 : Ami ta e lus di mundo,esun cu sigi Mi lo no cana den scuridad,ma lo tin e lus di bida.
Hesus a bolbe bisa den Juan 14:6: Ami ta e caminda, y e berdad,y e bida, ni un hende por yega serca e Tata, sino pa medio di Mi.
E ta bon pa pone na tur hende su conocemento cu cada persona individualmente mester kere den nan curason y confesa cu nan boca cu Hesus Cristo ta Senjor, y cu Dios a lanta E for di mortonan y lo bo ta salba,
Pasobra cu curason hende ta kere pa hanja husticia y cu boca e ta confesa pa hanja salbacion.( Romanonan 10:9-10).
Pesey no laga ningun hende kere cu e por hanja salbacion pa via di otro hende.
No laga ningun hoben kere cu pasobra nan mama of tata ta Cristian y ta biba pa Senjor , esey ta nifica cu e por sigi biba bida di bandido, haciendo maldad y toch drenta cielo. Como hoben bo mes mester tuma e decision personal di entrega bo bida na Senjor y biba pa Senjor.
Tampoco no laga ningun homber/muher kere cu door cu mi casa ta sirbi Dios y ta biba pa Dios, ami por sigi parandia, bebe scondi, cana den inmoralidad, y pa motibo di mi casa lo mi drenta cielo. No esey lo no ta posibel, ta bo mes como persona mester entrega bo bida.
Wak bon kico ta para scirbi den Mateo 24;40:41 y sabi cu dos hende por biba hunto pero ora cu Senjor bini uno ta bay y e otro ta keda, no ta importa cu nan ta casa, pasobra salbacion ta individual y Dios ta esun cu conoce tur curason. Aunke Lot su deseo tabata pa su casa bay cune, toch e casa no a alcansa, pasobra su curason tabata pega na cos di mundo.
Pesey henter nos famia, mester ta salba y bibando pa Dios, pa ora Cristo Hesus bini nos tur por subi hunto.
Corda bon cu ningun hende , no por salba ningun hende, e misa, tempel, salon, y iglesia cu bo ta bay no por salba bo, bo pastor, dominee,obispo, apostol no por salba bo. ( Efesionan 2:8-9), pasobra no tin otro nomber den cual hende por ricibi salbacion cu no ta den e nomber di Cristo Hesus.( Hechonan 4:10-12).
E tempo ta serca, e binida di Cristo Hesus ta serca,nos tur ta mirando e avance di maldad, y esey ta nifica cu Senjor ta bin busca su pueblo.
Sinceramente, Pastor Marcel Balootje.
