E oficial militar di rango mas halto di Ministerio di Defensa di Hulanda, Comandante di Forsanan Arma, General Onno Eichelsheim, a haci un bishita di trabao na Defensa den Region Caribe durante e ultimo dianan. Durante e bishita aki, Eichelsheim a bishita diferente unidad y cuartel militar.
Na Corsou, e Comandante di Fuerzanan Arma a bishita Base Naval Parera, punto di sosten di Wardacosta na Hato y Cuartel di Marina Suffisant. Na e luganan aki, el a conversa cu personal militar na Corsou y miembronan di Koninklijke Marechaussee.
Durante su bishita na Aruba, Eichelsheim a bishita Marinierskazerne na Savaneta y a subi bordo di e barco di estacion Zr.Ms. Friesland pa participa na e dia anual di nabegacion relaciona cu colaboracion entre diferente instancia.
General Eichelsheim a conversa cu personal militar tocante, entre otro, nan contribucion na operacionnan contra trafico di droga y e sosten cu nan ta brinda na polis y autoridadnan local.
Region Caribe semper ta den movimento
Segun e General, Region Caribe semper ta un region den movimento.
“E parti Caribe di Reino nunca ta para keto. Hunto cu autoridadnan local, nos coleganan di Marina, Ehercito y Marechaussee ta disponibel tur dia pa garantisa seguridad di e islanan. Operacionnan contra trafico di droga, tareanan di asistencia durante emergencia y sosten na autoridadnan local ta responsabilidadnan importante di Defensa den Region Caribe.”
Ademas di e tareanan regular aki, durante e ultimo aña e region a enfrenta tensionnan entre Merca y Venezuela.
“Nos personal militar den e region aki a brinda un contribucion significante pa haya un bista cla di e situacion y, mas importante ainda, pa proteccion di e islanan. Mi tin hopi aprecio p’esey. Finalmente, hunto nos ta mantene e islanan sigur, independientemente di cua menasa cu por presenta.”
Hulanda ta inverti mas den Defensa di Region Caribe
Gobierno Hulandes ta inverti den Defensa pa garantisa cu su fuerzanan arma ta prepara pa mantene Reino y su aliadonan sigur.
Pa Region Caribe, esaki ta inclui inversionnan den, entre otro, sistema di radar, medidanan contra drone, ampliacion di oranan di vuelo di Wardacosta y presencia permanente di un unidad di Marina.
Defensa tambe ta haci inversionnan adicional den ekipo, armamento y infrastructura di Militar Caribe (CARMIL), cu ta cumpli un papel importante den seguridad regional.
E inversionnan aki ta forma parti di e esfuerzonan pa fortalece capacidad militar y garantisa cu Defensa por reacciona efectivamente na diferente menasa y situacion di emergencia den Region Caribe.
