Den un famia, un mester cuida otro, esey ta e boluntad di Dios, Union, Pas, y Trankilidad,y tur locual tin para scirbi den salmo 131 esey mester sosode.
Papia bendicion den bo cas y bendicion lo alcansa bo cas, laga tur orguyo y arogancia un banda, stop di tira falta riba otro, stop di murmura, stop di zundra, stop cu manipulacion y hipocrecia, pasobra ningun di e cosnan ey ta trece bondad den cas.
Un famia por ta rico, pero si no tin amor, respet y humildad, nan ta pober y hopi pober pasobra pas no ta reina den cas, nan no tin comunion cu otro, nan ta rechasa otro, y caminda tin rechaso, ta imposibel pa uni den oracion.
Nos ta bibando den un tempo dificil, caminda cada ken tin cu habri wowo, cuida su famia, cuida su hogar, bataya den oracion, busca cara di Dios, yena cas cu alabansa y adoracion, pone Dios na prome lugar,
Boso cu ta teme Senjor confia den Senjor,E ta nan yudansa y nan escudo.
Senjor ta corda riba nos E lo bendiciona nos. E lo bendiciona esnan cu ta teme Senjor, tanto chikito como grandi.
Cu Senjor haci boso aumenta mas, y mas,boso y boso yuinan. (Salmo 115:11-14).
Ki dushi y ki bunita ta ora nos por desea bon pa otro, pasobra e mesun cara cu nos tin dilanti di Dios, e mesun cara nos mester tin dilanti di hende, Dios no conoce dos cara, pasobra ta un cara E a traha pa nos,Dios no ta funciona cu hipocrecia y mascarada.
Laga nos habri nos boca y bendiciona otro, pidi y desea bon pa otro, celebra e victoria di otro , mescos cu bo ta celebra esun di bo,pasobra esey ta amor pa prohimo.
Mi Dios lo provee tur loke boso tin mester, segun Su rikesa nan den Gloria den Cristo Hesus.( Filipensenan 4:19).
Bon palabra ta sana curason, ta kita mal pensamento, ta kita stress, preocupacion y depresion.
Palabra di berdad, ta corre cu mal influencia, y ta sera porta pa atake di e enemigo.
Laga bo hogar ta liber di insulto, liber di rabia, liber di mal comprendemento, pidi Dios pa Su gracia y Su amor ta bibo den bo cas y laga Su presencia goberna.
Riba caya por tin hopi inmoralidad, malicia y maldad, pero den bo cas y riba bo famia, ta Dios ta cuida y ta Dios ta goberna.
Papia cosnan cu bo kier mira sosode den bo famia, y no papia nada contra bo famia, pasobra bo ta papia contra bo mes.
Stima y bolbe stima bo yiunan, pasobra e amor cu bo tin pa bo yiunan ta nan defensa, esey ta pone nan tin confiansa den bo.
Haci tur oracion posibel pa bienestar di bo hogar, bo ta e vigilante di bo cas dilanti di Dios, tur locual cu abo papia Dios ta scucha y contesta.
No laga e enemigo hanja ningun chens, no dune ningun chens, no drenta ningun aventura, pero para firme riba e palabra di Dios, y Dios lo ta cu bo tur momento.
Un bon relacion den famia, ta bal mas cu diamanta, pasobra nos tur sa cu e enemigo a bini solamente pa horta, mata y pa destrui, pesey nos mester stima otro, pordona otro, pasobra asina nos ta mantene e enemigo leu for di nos hogar y nos famia.
Awor mas cu nunca amor mester prevalece, pasobra mundo ta yen di maldad, pero e yuinan di Dios, ta demostra cu e lus di Dios ta riba nan. Y Dios ta guia nan hogar y nan famia.
Sinceramente. Pastor Marcel Balootje.
