E incertidumbre rond di e maneho nobo cu Gobierno kier introduci pa e sector di vacation rentals na Aruba ta creciendo cada dia mas. Tanto doñonan di propiedad como inversionistanan local y famianan cu a inverti nan placa den e industria aki ta preocupa. Segun Parlamentario Dangui Oduber, Gobierno ta creando un clima di miedo y desconfianza door di anuncia cambionan cu por afecta hopi hende, sin brinda suficiente claridad tocante e futuro di e sector.
“Gobierno no por anuncia un maneho cu por afecta inversionnan di cien di miles di florin y despues laga pueblo den scuridad. E hendenan aki a inverti nan placa, a tuma prestamo na banco, a cumpra propiedad y a construi nan futuro. Awor nan ta spanta cu stress paso nan no sa exactamente kico Gobierno ta planeando.”
Falta di transparencia
Oduber ta cuestiona cu mientras Gobierno ta papia di registracion, zonificacion y posibel restriccion pa vacation rentals, e propietarionan ainda no tin claridad riba e criterionan cu lo determina nan futuro. E parlamentario ta señala varios pregunta urgente cu Gobierno tin obligacion di contesta:
- Ken lo por sigui opera y ken lo perde e derecho di huur nan propiedad como short-term rental?
- Kico lo pasa cu propiedadnan cu ya ta den mercado of cu a wordo cumpra specificamente pa e meta aki?
- Y kico lo ta e consecuencia pa localnan cu a inverti den propiedad riba tereno di erfpacht?
“Bo no por cambia e regla di e wega despues cu hende a inverti nan placa y laga nan sin sa si nan inversion tin futuro,” Oduber a enfatisa.
Proteccion pa e Arubiano comun
Oduber ta enfatisa cu hopi Arubiano a logra crea un entrada adicional door di huur un apartamento, studio of cas chikito na turista. Pa algun famia, e entrada aki ta yuda paga nan hipoteca, educacion di nan yiunan y e costo di bida cu ta sigui aumenta. “Nos no por permiti cu un maneho nobo ta termina na proteha solamente inversionistanan grandi, mientras e Arubiano comun cu a lucha pa logra un propiedad ta wordo exclui for di e mercado.”
Registracion sin garantia y exigencia di claridad
Aunke registracion por forma parti di un sistema di ordenacion, registracion so no ta suficiente pa duna siguridad na un famia cu a inverti tur su placa. Propietarionan mester sa kico ta e consecuencia di registra of no, con nan propiedad lo wordo evalua y ki garantia nan tin pa sigui opera. “Si Gobierno ta pidi pueblo registra, Gobierno mester splica exactamente kico lo pasa despues,” Oduber a enfatisa.
Pa e motibo aki, e ta exigi pa Gobierno publica inmediatamente:
- E criterionan exacto pa determina ken por sigui opera.
- E mapa di zonificacion y e base legal di e maneho.
- E reglanan specifico pa propiedadnan riba erfpacht y e trato pa inversionnan existente.
- E derechonan di apelacion pa propietarionan.
Ademas, e ta pidi un estudio di impacto economico y dialogo real cu doñonan di propiedad, companianan di real estate, banconan y inversionistanan local.
Regula si, pero no destrui oportunidadnan economico pa nos hendenan
Oduber ta enfatisa cu e no ta contra regulacion di vacation rentals. Aruba mester di reglanan cla pa proteha nos comunidad, barionan y industria turistico, pero esaki mester ta husto, transparente y proporcional. “Nos mester habri porta pa mas local participa den turismo, no cera porta den nan cara,” e parlamentario a subraya.
Pa finalisa, Parlamentario Oduber ta haci un yamada directo na Gobierno pa brinda claridad y siguridad huridico: “Basta cu incertidumbre y falta di claridad. E local cu a traha duro, a spaar y a inverti den su propio futuro merece respet. Un Gobierno responsabel ta crea confiansa, no miedo. Turismo no por ta solamente pa esnan grandi; e mester sigui crea prosperidad y oportunidad pa nos propio pueblo!”
