Screenshot

Un mucha no semper ta bisa cu algo no ta bon. Tin biaha e cambio di comportacion, e silencio, e miedo pa haci un pregunta of e manera cu e ta retira su mes, por ta e unico señal cu e ta duna.

Nos, como adulto, no semper ta ripara e señalnan aki. Tin biaha nos ta demasiado ocupa pa tende, demasiado pura pa contesta, of nos ta interpreta e reaccion di un mucha sin purba compronde loke e ta pasando aden.

Pero scucha un mucha ta exigi mas cu simplemente tende loke e ta bisa. Ta dedica tempo, observa, haci pregunta y crea confiansa. Un mucha mester por sinti cu e por papia sin miedo di wordo ridiculisa, castiga of ignora. 

Esaki ta particularmente importante ora un mucha ta enfrenta un situacion dificil: problema na scol, intimidacion, conflicto den cas, maltrato of algo cu ta causa miedo of insiguridad.

No tur mucha lo haya e palabranan pa conta loke ta pasando. No tur mucha lo pidi yudansa directamente. P’esey, e responsabilidad di nos como adulto ta tambe pa observa y no ignora señalnan cu merece atencion.

Scucha ta e prome paso. Accion ta loke mester sigui.

Na cas, na scol y den comunidad, nos mester crea espacio unda muchanan por expresa nan preocupacion y haya un contesta responsabel. Ora un mucha comparti algo delicado cu nos, nos mester:

  • Scucha sin interumpi ni husga.
  • Tuma loke e ta conta na serio.
  • No haci e mucha sinti cu e tin culpa.
  • Busca yudansa profesional of e instancia responsabel ora ta necesario.
  • Sigui compaña e mucha y percura pa su bienestar.

No ta tur situacion nos por soluciona cu un combersacion. Tin momento cu ta necesario pa actua y busca proteccion. Como sociedad, nos mester puntra nos mes: nos ta duna muchanan suficiente confiansa pa nan por papia? Y ora nan finalmente papia, nos ta reacciona na e manera cu nan mester?

Un mucha no mester lucha pa haya atencion. Su bienestar mester ta un prioridad. E bos di un mucha por ta suave, por ta insigur, of por hasta keda sin palabra. Pero esey no ta haci e bos menos importante.

Nos responsabilidad ta pa crea e espacio, duna atencion y actua ora un mucha tin mester di nos. Pasobra un sociedad cu kier proteha su muchanan mester ta prepara pa scucha tambe loke no semper ta facil pa tende.

Nos ta scucha nan? Y mas importante ainda: nos ta haci algo cu loke nos ta tende? E cambio ta cuminsa cerca cada un di nos.