Dia 16 di november, personal militar di Fuerzanan Arma Hulandes den Region Caribe a contribui na celebracion di 250 aña di Statia Day na Sint Eustatius. Durante e ceremonia na Fort Oranje, Su Mahestad Rey Willem-Alexander tabata presente, hunto cu representantenan di Hulanda, Merca y region Caribe.

Conmemoracion di e “Prome Saludo”

Dia 16 di november 1776, gobernador Johannes de Graaff a ordena Fort Oranje pa contesta un saludo di e barco Mericano Andrew Doria. E momento aki, conoci como e “Prome Saludo”, ta wordo considera ampliamente como e prome reconocemento di independencia Mericano door di un funcionario stranhero. Cu esaki, Sint Eustatius a haya un luga unico den historia di Revolucion Mericano.

Contribucion militar conhunto

Zr. Ms. Pelikaan, Zr. Ms. Friesland, e ‘Compagnie in de West’ y personal militar di Corsou a forma parti di e contribucion militar durante e ceremonia. Hunto cu unidadnan Mericano y personal di Fuerzanan Arma Hulandes den Region Caribe, nan a organisa un homenahe historico tanto for di lama como for di tera.

E barco naval Mericano USS Minneapolis-Saint Paul a dispara 13 cañon como saludo, cu a wordo contesta for di tera cu 11 disparo di cañon efectua pa militarnan di Corsou.

Despues di e saludo, un avion militar Mericano HC-130J a bula pasa riba e area.

Mediante e colaboracion aki, diferente unidad militar a participa den conmemoracion di e momento historico significativo, 250 aña despues di e acontecemento original.