Ministerio di Relacionnan den Reino, Educacion, Hubentud, Innovacion y Deporte di Aruba, representa pa Minister Gerlien L. Croes, a firma un Memorandum di Entendimento (MOU) cu Niagara College of Applied Arts and Technology di Ontario, Canada, representa pa Senior Director di Business Development y Enterprises, sr. Gary Torraville.

E acuerdo aki ta reestablece un marco di cooperacion formal cu e meta pa facilita acceso na educacion avansa na Canada, stimula mobilidad di studiante, y desaroya habilidadnan profesional cu ta concorda cu e prioridadnan di e mercado laboral na Aruba. Adicionalmente, e cooperacion ta habri porta pa explora oportunidadnan di capacitacion y desaroyo profesional pa docentenan di Aruba (teacher training), cu e meta di sigui fortalece calidad di enseñansa na nos pais.

Niagara College ta un institucion publico Canades reconoci pa su enfoke practico y su programanan enfoca riba e preparacion directo pa e mercado laboral.

E MOU, cu ta drenta na vigor pa un periodo di 5 aña, ta reestablece e base pa cooperacion academico y oportunidadnan di formacion entre ambos entidad.

Beca pa Studiantenan di Aruba

Como parti di e acuerdo aki, Niagara College ta introduci un skema di beca (scholarships) pa studiantenan eligibel di Aruba cu wordo admiti den programanan full-time di e institucion:

E beca di entrada tin un suma di CAD $2,500 pa e prome semester di estudio y renobacion pa semesternan posterior lo tin un suma di CAD $1,500 pa cada semester sigui. Pa mantene y renoba e beca, e studiante mester keda inscribi full-time y mantene un promedio (GPA) acumulativo minimo di 80% den e semester anterior.

Programanan Aplicabel
E beca ta aplicabel pa programanan full-time di diploma, diploma avansa y certificado di posgrado. Programanan di idioma Ingles (EAP/ESL), cursonan cortico y formacion no-credita ta keda exclui di e skema aki.

Explorando Oportunidadnan di Capacitacion pa Docentenan

Un otro aspecto importante di e cooperacion cu Niagara College ta e posibilidad pa desaroya oportunidadnan di capacitacion y formacion profesional pa docentenan di Aruba.

Ministerio di Educacion ta explorando, hunto cu Niagara College, e posibilidadnan pa facilita programanan di teacher training y desaroyo profesional continuo, cu por contribui na fortalecemento di capacidadnan pedagogico, metodonan moderno di enseñansa y intercambio di conocemento y experencia internacional.

E iniciativa aki ta alinea cu e vision di Ministerio di Educacion pa sigui inverti no solamente den oportunidadnan educativo pa nos studiantenan, sino tambe den crecemento profesional di nos educadornan, reconociendo nan rol esencial den desaroyo di un sistema educativo di calidad.

E posibilidadnan aki ta ainda den fase exploratorio y lo wordo evalua mas profundamente den cuadro di e cooperacion entre ambos entidad.

Financiamento y Apoyo Adicional

Studiantenan Arubano cu ta cumpli cu e rekisitonan aplicabel por haci uzo tambe di e programa di prestamo di estudio di Gobierno di Aruba pa yuda cubri e gastonan di estudio. Tur gasto adicional cu no wordo cubri pa e beca of prestamo (manera gastonan di biba, biahe y seguro) ta responsabilidad di e studiante.

E iniciativa aki ta un paso firme den e compromiso di Ministerio di Educacion pa habri mas porta internacional pa nos hubentud, promoviendo e desaroyo di talento y innovacion pa e futuro di Aruba.