Hopi biaha nos ta tende hende papia tocante di falta di pordon, bisando cu nan no ta pordona, nan ta pordona pero nan no ta lubida, laga Dios pordona bo, nan ta pordona cu condicion , cu e persona ey no pasa banda di nan, y hopi cos mas.
Pero si pordon no tabataa importante dilanti di Dios, anto e lo no wordo ripiti tanto biaha door di Cristo Hesus den bijbel y hasta parabola a wordo scirbi tocante di falta di pordon.
Falta di pordon, hasta a bira un instrumento familiar, pa transporta rabia y odio, y hasta amargura,e ta cuminsa den antepasadonan cu no a pordona otro, y asina e ta sigi cana den Famia, bisando no mete cu tal y tal pasobra hopi anja pasa su padushi a haci algo malo.
Awor nos ta mira hasta den e gangnan di bario con falta di pordon, ta crece y con vengansa ta wordo tuma,ora tur hende a kere cu algo a termina,gera ta cuminsa bek pa un pleito bieu, pasobra no tin pordon.
Awor den Hebreonan 12:14 e palabra di Dios ta bisa: Aspira pa tin pas cu tur hende , y santificacion sin cual ningun hende lo mira Senjor.
Si un hende no ta pordona e no tin pas.
Si un hende no tin pas, e no por papia di santificacion.
Si Hesus ta bisa den Mateo 6:14-15 cu nos tin cu pordona, pa asina nos Tata cu ta den cielo tambe pordona nos.
Esey ta nifica cu falta di pordon ta un pica.
Pasobra solamente Dios por pordona pica.
Tambe e ta wordo ilustra den mateo 18:21-35. Caminda e rey ta sera esun cu no ta pordona den prison hunto cu burdugo. ( awor nos tur sa ken ta e burdugo di nos alma).
Falta di pordon ta kibra matrimonio.
Falta di pordon ta kibra famia.
Falta di pordon ta kibra un yiu su curason.
Falta di pordon ta kibra cualkier negoshi.
Falta di pordon ta kibra hopi organisacion.
Falta di pordon ta hiba na problema y na violencia.
Falta di pordon ta pone hende busca salida den droga y alcohol y bira adicto.
Falta di pordon ta pone hende cana cu duele na curason, y asina wordo mentalmente afecta.
Falta di pordon ta pone hende tuma mal decision.
Falta di pordon ta pone herencia bay perdi.
Hende cu ta biba den falta di pordon ta biba den rebeldia contra Dios, pasobra e oracion di Nos Tata ta sinja nos pa pordona otro.
E palabra di Dios ta sinja nos den Colosensenan 3;13-14, pa nos pordona otro.
E palabra di Dios ta bisa pa pordona prome cu pone ofrenda na altar.
Esun cu ta haci pas ta wordo yama homber di pas.
Esun cu ta haci gera ta wordo yama homber di gera.
Nos no por bisa nos stima Dios y nos ta ignora, rebaha, rechasa nos ruman,pasobra Dios ta amor.
Un hende cu no ta pordona ta keda draai rond riba e mesun asunto te ora e asunto haci su persona of otro persona un danjo.
Bijbel ta avisa nos tur momento cu den e ultimo dianan lo tin tempo trabahoso, caminda nos tur ta mira con caracter di hende ta cambia, pasobra mundo no a cambia, ta hende a cambia, ta hende a bira
materialista, rebelde y cu no kier pordona.
No tin regalo mas bunita den un cas caminda tur hende ta pordona otro y biba bon cu otro, pasobra esey ta boluntad di Dios, pa amor reina den cas, y trece sanacion, y liberacion, y tur hende ta contento.
Sinceramente, Pastor Marcel Balootje.





