Den bida hende ta preocupa cu nan situacion financiero, con ta gana placa, con ta maneha placa, pero tur e cosnan ey ta temporal, pasobra solamente cosnan di Dios ta eterno.
Pesey nos mester tene cuenta cu nos crecemento spiritual, tur momento, y especial e crecemento spiritual di nos yiunan, pasobra nos mester sinja nan cu placa por caba, hende por bay, pero Dios tey pa semper.
2 Pedro 1:5-8-9 ta para scirbi: Kendenan ta proteha door di e poder di Dios,pa medio di Fe,pa un salbacion cu ta cla pa wordo revela den e ultimo tempo.
Den esaki boso ta regosiha grandemente,aunke cu awor pa un tempo cortico, si ta necesario, boso a wordo afligi pa varios prueba,pa e prueba di boso fe, cu ta mas precioso cu oro cu ta perece,aunke cu e ta wordo proba door di candela, lo por resulta den alabansa y gloria y honor ora Hesus Cristo wordo revela.
Maske boso no a mir’E boso ta stim’E y maske boso no ta mir’E, mata kere den dj’E, boso ta regosiha grandemente cu goso inexplicabel y yen di gloria.
Hanjando como resultado di boso fe e salbacion di boso alma.
Colosensenan 1:9-10 ta para scirbi: Pa e motibo aki tambe, for di e dia cu nos a tende di esaki, nos no a stop di haci oracion pa boso, y di pidi pa boso wordo yena cu conocemento di Su boluntad den tur e sabiduria spiritual y comprendemento. Y nos ta pidi pa boso cana na un manera digno di Senjor , pa agrad’E den tur sentido,dunando fruta den tur bon obra,y creciendo den e conocemento di Dios.
Colosensenan 2:6-7 ta bisa: Pesey mescos cu boso a ricibi Cristo Hesus e Senjor, asina cana den dj’E, siendo firmemente araiga, y awor edifica den dj’E y estableci den boso fe, mescos cu boso a wordo instrui y ta abunda den gradicimento.
Santiago 1:2-4 ta para scirbi: Considera esaki como puro goso mi rumannan ora boso hanja boso mes den diferente pruebanan. Sabiendo cu e prueba di boso fe ta produci perserverancia. Y laga perserverancia tin su resultado perfecto,pa boso por ta perfecto y completo sin falta di nada.
Tito 2:11-14 ta para scirbi: Pasobra e gracia di Dios a parece , treciendo salbacion na tur hende. Sinjando nos pa renuncia impiedad y deseonan mundano.y pa biba huicioso , husto y santo den e siglo presente. Wardando riba e speransa bendiciona y e aparicion di e gloria di nos gran Dios y salbador Cristo Hesus. Kende a duna su mes pa nos,pa e por redimi,nos di tur inikidad y purifica pa Su mes un pueblo peculiar cu zelo den haci mento di bon obra.
E bida cristian no ta un bida di cobardia, ta un bida real cu e berdad di Cristo Hesus tur dia nos dilanti, tur locual tin scirbi den e palabra di Dios , ta pa encurasha nos pa biba den santidad, y poniendo Cristo Hesus na prome lugar den nos bida.
Tur locual ta riba tera ta temporal, y nos tur sa cu ora nos muri , nos no por hiba nada cu nos, pero nos tesoro ta den cielo caminda nos Rey y Salbador ta sinta na man drechi di e Tata.
Salmo 60:4 ta bisa: Bo a duna bandera na esnan cu tin temor di Bo, pe por wordo hisa pa causa di berdad.
Nos Dios ta un bon Dios, y e tin cosnan grandi pa esnan cu nan curason ta dedica na dje.
Sinceramente, Pastor Marcel Balootje.





