Prome Minister di Sint Maarten, Dr. Luc Mercelina, a destaca e importancia di combati pobresa y mehora calidad di bida di nos ciudadanonan den Reino Hulandes. Den un entrevista despues di e prome dia di Kingdom Summit, Mercelina a reconoce tambe e iniciativa Common Good di Prome Minister Mike Eman, cu ta pone bienestar di pueblo y interes general di comunidad den centro di desaroyo economico y social. E prome dia di Kingdom Summit a resulta den un dialogo positivo entre e delegacionnan di Aruba, Corsou, Sint Maarten y Hulanda. El a califica e encuentro como historico, mirando cu ta despues di 11 aña cu e lidernan di e cuatro paisnan ta bolbe reuni den un conferencia di e tipo aki.

E Prome Minister a destaca cu e retonan cu e paisnan ta enfrenta no ta limita na e islanan Caribense, pero ta afecta tambe e poblacion di Hulanda. Pesei, e ta considera importante pa e cuatro gobiernonan busca solucionnan hunto. “Nos tin un problema grandi, specialmente den Caribe, tocante pobresa. Esaki ta un di mi preocupacionnan pa Sint Maarten. Nos a discuti diferente posibilidad pa combati pobresa di un manera coordina, hunto cu e otro paisnan di Reino”, Mercelina a declara.
Mercelina a enfatisa cu pobresa no ta un problema di Sint Maarten solamente, pero un reto cu Aruba, Corsou y Hulanda tambe ta enfrenta. Segun dje, e momento a yega pa e lidernan di Reino uni nan esfuersonan pa busca solucionnan cu por mehora e calidad di bida di nan ciudadanonan.

Mercelina ta reconoce iniciativa Common Good di Eman
Un momento importante den e entrevista tabata ora cu Mercelina a haci referencia na e conferencia Common Good cu Prome Minister Mike Eman a organisa anteriormente, y na cual e mes a participa. Segun Mercelina, e pensamento di bienestar colectivo ta conecta directamente cu e obhetivo di Kingdom Summit, cu ta busca mehora e prosperidad y calidad di bida di tur ciudadano den Reino.
E vision aki ta den linea cu e mensahe cu Prome Minister Eman a presenta durante su discurso State of the Nation. Eman a destaca cu, a pesar di e crecemento economico y turistico significativo na Aruba, ainda tin alrededor di 18.000 empleado cu nan salario ta bou di e bestaansminimum. Pa Eman, e reto principal ta pa logra cu e prosperidad economico traduci den bienestar real pa pueblo, specialmente pa e empleadonan y e famianan vulnerabel.
Mientras cu Eman ta pone enfasis riba e necesidad pa conecta crecemento economico cu bienestar social, Mercelina ta destaca e importancia di cooperacion entre e cuatro paisnan pa combati pobresa.
Un Reino cu ta traha pa bienestar di tur ciudadano
Mercelina tin un mensahe tocante e responsabilidad comparti di e cuatro paisnan.
“No ta trata di e Arubianonan, ni di habitantenan di Corsou of Hulanda. Ta trata di e ciudadanonan di Reino Hulandes, pa kende nos lo traha duro pa mehora nan prosperidad”, e Prome Minister di Sint Maarten a expresa. E declaracionnan di Mercelina y Eman ta mustra un punto den comun entre ambos lider: e necesidad pa cooperacion den Reino ta bay mas leu cu e relacionnan gubernamental y traduci den varios solucion concreto pa combati pobresa y mehora e bienestar di tur pueblo.
E Kingdom Summit ta continua diaranson 18 di november, cu deliberacionnan entre e delegacionnan y e intencion di presenta un declaracion final tocante e cooperacion futuro den Reino Hulandes.





