Organisacion Caballista Arubano (OCA) ta preparando pa organisa su ultimo feria di cabay pa aña 2026, cu lo tuma luga na Centro Deportivo Betico Croes na Santa Cruz. E evento aki ta brinda un oportunidad special pa tur amante di deporte di cabay na Aruba reuni y disfruta di un competencia den un ambiente deportivo y familiar.

E feria lo conta cu dos dia di competencia. Diabierna, e actividadnan lo cuminsa pa 6:00 PM, mientras cu diadomingo e competencia lo inicia pa 5:00 PM. Durante e dos dianan aki, publico lo tin oportunidad di admira e bunitesa di cabaynan y e habilidad di nan cabayeronan durante e diferente presentacionnan riba pista.

Pa e ultimo feria di aña, OCA lo conta cu participacion di señor Enthomar Francisco di Corsou, kende lo fungi como juez di e competencia. Su presencia ta forma parti di e organisacion di e evento, unda e participantenan lo presenta nan cabaynan dilanti di e juez.

Preparacion di pista y agradecimento

Un aspecto importante di e feria aki ta e trabao logistico cu a ser realisa pa transforma e veld di Centro Deportivo Betico Croes den un pista adecua pa competencia di cabay.

Organisacion Caballista Arubano kier expresa su agradecimento sincero na tur persona cu, di un manera of otro, a contribui na e preparacion y logistica di e evento. Gracias na e esfuersonan aki, a logra prepara e tereno pa ricibi e cabaynan, participantenan y publico.

Invitacion na comunidad

Cu e ultimo feria di 2026, OCA kier brinda publico un oportunidad mas pa aprecia e deporte di cabay, cu ta forma parti di e actividadnan deportivo y cultural na Aruba.

Organisacion Caballista Arubano ta extende un invitacion cordial na henter comunidad Rubiano pa bishita Centro Deportivo Betico Croes na Santa Cruz y disfruta di e competencia.

E organisacion ta spera di conta cu sosten di publico pa cera aña 2026 cu un celebracion deportivo dedica na e bunitesa, elegancia y tradicion di cabay na Aruba.