Un agenda di trabao cu acuerdonan concreto di cooperacion entre gobiernonan di e cuater paisnan di Reino Hulandes, den interes di nan habitantenan, ta uno di e resultadonan principal di e prome Kingdom Summit cu a tuma luga dia 17 y 18 di november na Sint Maarten. Durante e encuentro, e paisnan a acorda di reuni anualmente den forma di un Kingdom Summit of Conferencia di Reino. Tambe a keda acorda cu na 2027 Corsou lo organisa e prome Conferencia di Reino despues di 12 aña.

Premier Mike Eman di Aruba, premier Gilmar Pisas di Corsou, premier Luc Mercelina di Sint Maarten y secretario di estado Eric van der Burg di Asuntonan Interno y Relacionnan di Reino Hulandes a discuti diferente tema importante. Entre esakinan tabata bienestar general, resiliencia y seguridad, seguridad social y retencion di talento pa mercado laboral den e paisnan Caribense.

Den e conclusionnan firma na final di e Summit, gobiernonan di Aruba, Corsou, Hulanda y Sint Maarten ta reconoce importancia y beneficio mutuo di un cooperacion estrecho. E gobiernonan kier sigui construi riba e relacionnan di cooperacion cu ya ta existi y explora posibilidadnan pa profundisa esakinan.

Den e agenda di trabao, cu ta forma un anexo di e conclusionnan, e cuater paisnan a identifica e temanan specifico riba cual nan kier fortalece nan cooperacion.

Stimula bienestar general, desaroyo economico y retencion di talento

Uno di e prioridadnan ta logra cu e entradanan genera pa turismo contribui mas directamente na bienestar general di e poblacion.

Tambe lo explora con por realisa inversionnan necesario den facilidadnan publico, adaptacion na cambio climatico y transicion energetico, cu sosten di financiamiento externo, incluyendo fondonan Europeo.

Un otro punto importante ta cooperacion regional den maneho di desperdicio. E paisnan ta considera cu un acercamento conjunto por contribui na un sistema mas sostenibel pa coleccion, transporte y procesamiento di desperdicio.

Pa esaki, lo haci un inventarisacion di diferente iniciativanan cu actualmente ta den desaroyo. Basa riba e resultadonan, e paisnan lo elabora propuestanan concreto pa procesamiento y transporte di desperdicio, incluyendo e manera di financia e actividadnan aki.

Durante e proceso, lo tene cuenta cu e circunstancianan specifico di Islanan Abou y Islanan Ariba.

Mas oportunidad di trabao y economia di conocemento

Pa stimula economia di conocemento, Hulanda lo sostene e paisnan Caribense den nan esfuersonan pa atrae institucionnan Hulandes di enseñansa y investigacion, como tambe companianan cu por contribui na desaroyo economico.

E cooperacion aki mester crea mas oportunidad di trabao di calidad halto y fortalece e economia di e paisnan Caribense.

Un otro desafio importante ta envehecemento di poblacion y e hecho cu hopi estudiante Caribense ta dicidi di keda biba na Hulanda despues di finalisa nan estudio.

Pa evita perdida di talento, e gobiernonan a acorda di intercambia experiencianan y ehempelnan di practica exitoso cu por stimula regreso di estudiante na nan pais di origen.

Tambe lo comparti experiencia cu solucionnan cu a demostra nan efectividad den area di pension, seguro di salud y sistemanan di proteccion social.

Fortalecemento di cooperacion entre e cuater paisnan

Kingdom Summit ta un encuentro administrativo entre gobiernonan di e paisnan autonomo di Reino Hulandes. E objetivo principal di e encuentro ta fortalece cooperacion entre Aruba, Corsou, Hulanda y Sint Maarten.

Durante e Summit, cada pais a presenta su propio State of the Nation, den cual nan a destaca tanto e logronan como e desafionan cu nan ta enfrenta.

E presentacionnan aki tambe a brinda oportunidad pa identifica areanan den cual un cooperacion mas estrecho por contribui na solucionnan concreto.

Cu e agenda di trabao y e compromiso pa reuni anualmente, e cuater gobiernonan ta busca di transforma nan dialogo den accionnan cu por produci resultadonan tangibel pa habitantenan di Reino Hulandes.