Diahuebs anochi, acompaña pa famia y amigo, Eddy Oduber a presenta oficialmente su buki ‘Keda leu di Cangreu’ na Biblioteca Nacional Aruba. E buki, skirbi na Papiamento, ta contene 55 articulo cu ta invita e lesado pa pensa, reflexiona y compronde su mes y comportamiento humano miho.

E buki a nace for di HypnotiSA, un columna semanal cu Eddy a cuminsa skirbi pa Diario na 2006. Mediante experiencia personal, historia, metafora y reflexion, e ta explora con nos pensamento, creencia, miedo y mente subconsciente ta influencia nos bida diario.
Durante e presentacion, Eddy a comparti e historia di con e buki a nace, incluyendo un encuentro conmovedor cu un lesado, kende su palabranan a anima Eddy pa finalmente publica e articulonan den forma di un buki.

Como reconocemento pa su contribucion na e cuminsamento di e columna original, Eddy a entrega e prome ehemplar na Sra. Nuhad Mansur. E di dos ehemplar el a entrega na Biblioteca Nacional, como muestra di aprecio pa su importante trabou den conservacion di nos idioma, literatura y herencia cultural.
Eddy a conclui e anochi cu un mensahe simpel cu ta resumi e proposito di su buki: “Mi no kier bisa hende kico nan mester pensa. Mi kier invita nan pa pensa.”





