Diabierna, 20 di november, Ministerio di Relacionnan den Reino, Educacion, Hubentud, Innovacion y Deporte di Aruba a organisa un Conferencia di Hobennan na Renaissance Convention Center, caminda alrededor di 120 hoben di diferente scol rond Aruba a bin hunto pa comparti nan experencia, preocupacion y ideanan tocante temanan clave pa nan bida diario y nan futuro.
E encuentro aki ta forma parti di un consulta cu hobennan, cu e meta principal pa brinda nos hubentud un plataforma habri y sigur pa expresa nan opinion y contribui directamente na futuro maneho integral di gobierno.
Durante e conferencia, e hobennan a dialoga y duna nan aporte riba cinco tema central cual ta bienestar mental, stress y resiliencia, scol sigur, bario sigur y siguridad online, enseñansa, habilidad y preparacion pa futuro, estilo di bida saludabel, curpa y acceso na informacion, influencia, inclusion y confiansa den maneho.
E conferencia a conta cu presencia di Minister di Hubentud, sra. mr. Gerlien Croes, Ministerio di Hubentud, boluntarionan y Nationaal Coordinator Jeugdbeleid, sra. Misha Raymond, kende a guia e hobennan y duna nan oportunidad pa un dialogo habri pa medio di diferente pregunta. E plataforma a ofrece espacio pa papia tocante e nivel di stress cu hobennan ta sinti durante un siman regular di scol, e factornan principal cu ta causa esaki manera scol, mayor, amigo, medio social, relacion of placa y cerca ken nan ta acudi ora nan no ta sinti nan mes bon.
Tambe nan a papia tocante con sigur hobennan ta sinti nan mes na scol, den nan bario y riba internet, ki forma di bullying of intimidacion ta pasa mas frecuente y kico scolnan y comunidad por haci pa reduci violencia y pelea y con nos hubentud ta mira nan futuro na Aruba, si nan ta haya suficiente espacio pa desaroya nan propio talento y interes, y ki habilidad practico nan ta siña na scol cu ta realmente importante pa nan futuro.
Adicionalmente a toca e tema di na unda hobennan ta busca informacion confiabel tocante nan salud y curpa, specialmente ora nan tin pregunta cu nan no ta tribi haci na nan mayornan y ki actividad deportivo, cultural of recreativo nan ta haya falta di dje na Aruba. Por ultimo, e dialogo a enfoca riba con hobennan lo prefera duna nan opinion na gobierno y con nan ta mira e idea di lanta un conseho di hobennan pa participa activamente den decisionnan di maneho.
Cu e iniciativa aki, Minister Gerlien Croes ta reafirma su compromiso pa pone e bos di nos hubentud central den formacion di maneho nobo. E ideanan y recomendacionnan cu sali for di e consulta aki lo sirbi como base importante pa e maneho integral di hoben y pa fortalece enseñansa, bienestar y oportunidadnan pa tur hoben na Aruba.











