Despues di a gana tur caso den corte, awor Endy Croes ta sigui cu otro demanda contra e compania di Accountant Ernst & Young pa asina cobra daño ocaciona na su persona pa un rapport falso.
Na aña 2012, tres hues a dicta dia 28 di November, cu ta libera Endy di tur acusacion imponi riba dje, debi cu e acusacionnan no ta sostenibel ni tin nada di haber cu Endy Croes. Pues Endy a wordo saca for di e caso y nunca mester a ni presenta dilanti un huez penal.
A sigui varios caso mas den corte, unda cu na 2018 a bolbe gana otro caso, esun di mas importante, dicta pa Corte di Casacion na Hulanda, unda 3 huez a dicta sentencia: Rapport di Ernst & Young ta falso. Esey ta nifica cu e rapport di Ernst & Young automaticamente a wordo tira den bari sushi, como un rapport cu no por keda existi.
Despues di 11 aña den lucha pa husticia, awor a cuminza un caso contra Ernst & Young pa asina exigi un compensacion di dañonan ocaciona na Endy Croes.
Ernst & Young no a tuma e responsabilidad aki riba dje, y kier laba man, pero den corte, Ernst & Young a manda yama Lotto pa nan tambe join e caso, pasobra segun Ernst & Young, cu ta Lotto mester paga e placa di daño.
Dia 9 di Juni 2021 e caso lo sigui, y cual lo bay dura hopi ainda, prome cu bini un final, pa cual e essecia ta cu esnan cu a haci obranan di mala fe, traha rapport falso, causa daño na otro, mester para responsabel awor y compensa esaki.
Abogado Anthony Ruiz ta representa Endy Croes den e 11 aña di lucha contra loke obviamente por wordo mira como un persecucion politico sin precendente.
