Na mei ultimo Museo Arqueologico Nacional Aruba (MANA) a muda e exposicion internacional, “Lasonan Caribeño, hende conecta, antes y awor”, pa Biblioteca Nacional Aruba San Nicolas. For di momento cu a habri e expo el a haya hopi atencion di publico. Biblioteca San Nicolas tin funccion importante den comunidad. Banda di fia buki y ofrece informacion ta ofrece espacio pa studia y ta trece comunidad hunto. Pesey e tabata e luga ideal pa tene e exposicion menciona.
MANA a acerca scolnan den vecindario, traimerdia y otro grupo den comunidad pa ofrece un bishita guia. Diferente scol di San Nicolas y tambe YMCA San Nicolas, di biaha a hasi uzo di e oportunidad y a reserva nan bishita pa fin di e aña escolar. Mucha y hoben a goza di e exposicion interactivo y asina a siña na un forma recreativo. “Lasonan Caribeño” ta conta e storia di Caribe indigena, for di tempo prome cu Columbus, pero for di punto di bista di e Indjannan. Publico por mira e diferencia y e similaridadnan entre e comunidadnan di diferente isla den Caribe y asina ta amplia su bista riba nos herencia cultural comparti.
E expo aki, cu ta den Papiamento y Ingles, tambe ta haya atencion positivo di turista cu ta haci tour cultural den San Nicolas. “Caribbean Ties” ta keda na biblioteca San Nicolas te mitar di september. Pues, scolnan cu no a logra ainda pa bishita “Caribbean Ties” na San Nicolas tin e posibilidad pa hasi esaki ainda na comienso di aña escolar nobo, prome cu move e exposicon pa otro luga.
Periodo di vakantie ta den cuminsa y MANA ta ofrece tambe bishita guia na exposicion Caribbean Ties San Nicolas pa camps of otro grupo vacacional. Tur scol of grupo mester hasi cita pa bishita e exposicon pa asina evita aglomeracion. Yama libremente na 582-8979 y tuma contacto cu Suzy, Jos, Karin, Ibia of Norwin pa haya mas informacion of traha un cita pa un bishita guia.
Pa esnan cu ta desea di bishita “Lasonan Caribeño” na biblioteca San Nicolas riba nan mes, y cu no ta den grupo, por hasi esaki durante orario di biblioteca San Nicolas. Orario pa publico ta di dialuna te diabierna di 8’or di mainta pa 5’or di atardi, cu excepcion di diamars cu ta habri te 7’or di anochi.
