Copa Europa 2020 cu pa motibo di pandemia di covid-19 no por a continua aña pasa a continua e aña aki, caminda cu tabata tin hopi wega interesante, y cu diaranzon atardi e di dos wega di semi final a tuma lugar.
Inglaterra a enfrenta Dinamarca pa mira kende ta bira e di dos ekipo cu lo hunga e final contra di seleccion di Italia.
E wega aki a inicia den bon forma pa esnan di Dinamarca cu na di 30 minuut ta haya un tiro liber cu Mikkel Damsgaard ta tuma y cu un tiro fuerte ta anota prome gol di wega y duna Dinamarca ventaha di 1-0.
Esaki ta prome gol su nan ta anota contra Jordan Pickford cu ta keeper di Inglaterra den torneo aki.
Inglaterra no a desespera despues di e gol aki, ya cu nan tabata tin publico na nan fabor y tabata ataca constantemente.
Na di 39 minuut e presion di Inglaterra a duna su fruto y pa medio di Simon Kjaer ta anota auto gol pa empata e wega pa Inglaterra.
Prome mitar a bay den descanso cu score empata 1-1.
Den di dos mitar ambos ekipo a lucha fuerte caminda cu keeper di ambos ekipo a luci bon riba hugadanan cu etiketa di gol.
Ningun di dos ekipo a logra anota gol den tempo regular y a sigui pa tempo extra, den tempo extra apenas na di 104 minuut, ta pasa un hugada cu a bira polemico caminda cu referee ta constata penalty pa Inglaterra y cu VAR a confirma, pero pa sorpresa di tur comentarista di tanto television y radio y medio social no ta mira nada cu a pasa.
Harry Kane ta tuma e tiro aki cu na prome instante ta wordo deteni pa keeper di Dinamarca, pero e bala ta cay den pianan di Kane un biaha mas y no ta faya di dos biaha y ta duna Inglaterra e ventaha di 2-1.
Asina tambe e wega a termina cu score di 2-1 na fabor di Inglaterra cu ta clasifica pa final contra di Italia cual wega ta diadomingo awor.
Esaki ta for di 1966 cu Inglaterra ta logra yega final di un torneo oficial di futbol, na aña 1966 Inglaterra a titula campeon di Copa Mundial cual a tuma lugar na Inglaterra mes, esaki lo por ta e caso of Italia lo hiba e trofeo cas, keda pendiente den Solo di Pueblo pa relato completo di e gran final.
