WILLEMSTAD – Kuido Intensivo na Curaçao Medical Center (CMC) pa pashèntnan ku COVID-19 y tambe Kuido Intensivo pa pashèntnan regular sin COVID-19 ta yenando pa motibu di scarsedad di personal di cuido intensivo, pues mester sigui escala den otro departamentonan.
E siguiente departamentu ku lo kombertí den un kuido intensivo ta “Recovery” kaminda normalmente pashèntnan ku kaba di operá ta keda algun ratu pa rekuperá despues di operashon. Komo konsekuensia CMC lo mester kanselá aun mas operashon elektivo pa por aloká espasio i personal pa asistí. En total, CMC tin 16 kama pa Kuido Intensivo i 10 Kama pa departamentu di kurason.
Huntu ku esaki tin un sierto kantidat di personal spesialisá ta traha ku tin e konosementu pa atendé ku pashèntnan ku mester di èkstra atenshon médiko. E oumento di pashèntnan den Kuido intensivo den e último dianan a pone ku mester a transladá tur pashènt di Kuido Intensivo ku no tin COVID pa departamentunan di emergensia di kurason i kuido intensivo di kurason.
Pues e departamentunan aki tambe a yena. Alabes mester a splet e tim di Kuido Intensivo den e departamentunan aki i reklutá enfermeronan i spesialistanan di otro departamentunan den CMC pa asistí esnan spesialisá den kuido intensivo. Kompará ku e punto kulminante di e pandemia na Aprel ora ku Hulanda a manda 137 spesialista i enfermero pa asistí, na e momentunan aki a sobra solamente 10 ku lo keda te ku fin di ougùstùs.
Di e 137 spesialistanan i enfermeronan, 55 tabata enfermeronan di kuido intensivo. Alabes, CMC a tuma nota ku e porsentahe di personal malu a oumentá bou di personal di sala di operashon i kuido intensivo kual ta un indikashon ku e preshon di trabou ta hopi haltu. Pues e kombinashon di tur esaki ta forma un preshon enorme bou di personal. E preshon haltu ta konta no solamente pa departamentu di Kuido intensivo i di kurason, sino hopi otro departamentu ku ta inkluí emergensia, neurologia, i departamentunan di enfermeria ku tin ménos personal ku nan por konta riba dje pa motibu di e re-alokashon di koleganan.
