Un feliz dia colma cu bendicion y gracia di Dios.
“Tur hende tabata busca moda di mishi cu n’E, pasobra E tabatin un
forsa cu ta sali for di djE y E tabata cura tur hende. Lc. 6,19
Despues di oracionnan na Su Tata, Hesus a scohe Su discipulonan pa
cumpli cu e plan di salbacion di Tata pa tur hende. Apesar di ta
pecadornan, Hesus ainda ta scohe Su ”ministronan consagra”, esta
obisponan, pastoornan y diacononan, pordona nan, sana nan, prepara
nan, consagra y ta manda nan pa forma e ”Pueblo di Dios” un mundo
nobo. Cada un di nos pa medio di nos bautismo cu yudansa di Spirito
Santo tambe tin cu mantene e Union, aprecio y ser clemente cu otro.
Nos mision ta den yuda e otro pa bo mes ta salba. Iglesia tin e
gracia, e forsa y ta misericordioso, ma ta den necesidad di NOS
ORACIONNAN. Nos tin e deber di resa sin descansa na Tata pa nos keda
fiel na Su mision. Den ser humilde, obra cu amor, cumpli cu Dios Su
boluntad. Resa pa obisponan, ministronan consagra y laiconan.
Oracion: Señor nos Dios duna nos e gracia cu nos por usa e siguiente
frutanan: Fruta di Silencio ta Oracion, fruta di Oracion ta FE, fruta
di FE ta Amor, fruta di Amor ta Sirbi y fruta di Sirbi ta PAZ. Laga
nos ban cuminsa den nos mesun cas. Amen.
