ORANJESTAD – Prome Minister Evelyn Wever-Croes, cu durante Gabinete Wever-Croes I tabata encarga cu e cartera di Energia, a haci traspaso di e cartera aki pa Minister Glenbert Croes. E cartera di Energia lo ta bou encargo di Minister Glenbert Croes den e gobernacion di Gabinete Wever-Croes II.
Prome cu eleccion 2021 y na final di e gobernacion anterior, Prome Minister a pidi tur colega minister pa prepara un “overdrachts document” pa asina na su momento haci e traspaso di carteranan mas eficiente. E huramentacion di cada minister pa Gabinete Wever-Croes II lo tuma luga na fin di e siman aki, pero mirando cu e gobierno nobo y e carteranan ya ta conoci, Prome Minister a cuminsa cu e traspaso di su carteranan pa e minister nobo cu lo tuma e carteranan aki over pa e duracion di Gabinete Wever-Croes II.
Den cuadro di traspaso di e cartera di energia, Prome Minister a tene un reunion cu colega Minister Glenbert Croes pa repasa e documentacion di tur e esfuersonan haci door di su persona durante e ultimo 4 añanan. E documento mas importante ta e maneho di energia ya cu pa prome biaha den historia Aruba tin un “energy policy” cu lo wordo publica pronto pa e minister encarga. E maneho aki a wordo diseña door di tur e stakeholdernan di energia na Aruba cu durante 3 cumbre a duna nan contribucion pa con Aruba lo bay cumpli cu e tratado di Paris di 2050.
Aruba tambe a bin na remarke pa haña un suma di 900 mil euro di Union Europeo pa ehecucion di e maneho aki. Esaki sigur ta haci e trabou di e minister nobo uno mas eficiente ya cu e ta yega haña e maneho cla y cu fondonan disponibel pa e por ehecuta debidamente.
Pa loke ta trata refineria, tin hopi planificacionnan andando pero un logro grandi di Prome Minister ta di por a sali di e contract cu Citgo y habri un destaho publico pa por busca mas interesado pa cu e refineria. Otro logro grandi di Gabinete Wever-Croes I ta e rebaho den prijs di awa y coriente cu 10% pa residencianan. Pa loke ta awa pa e cunukeronan e minister encarga lo tin retonan grandi mirando cu e gastonan di fuel lo aumenta y lo mester purba na sali afor sin tin mester di pasa e gastonan aki pa comunidad. Pa loke ta trata e otro companianan, tambe Gabinete Wever-Croes I a logra cosnan grandi.
“Awe mi ta contento di por traspasa e cartera di Energia na mi Colega Minister Glenbert Croes y y mi ta sigur cu e lo haci un bon trabou,” Prome Minister Evelyn Wever-Croes a termina bisando.
