Ayera SIMAR a reuni cu minister di enseñansa, ta despues cu nan a manda un carta pa e mandatario y den un tempo record a haya un contesta bek, invitando nan pa un reunion na Cocolishi. Awe a busca di e presidente di e sindicato cu ta representa gran parti di e docentenan na Aruba. “A yega tempo pa trece trankilidad bek den enseñansa”, asina Josephine Albertus di SIMAR a inicia bisando.
Nan a pasa den un periodo di 4 aña di intrankilidad pa cu enseñansa y awo a yega tempo pa restaura trankilidad den e veld. E docentenan a pasa 4 aña sin paz laboral y cu diferente preocupacion, awo a yega tempo pa trece respet bek pa e veld. Durante e reunion di ayera, SIMAR a trece diferente punto dilanti, cu den pensamento di SIMAR tin cu yega na un solucion den futuro cercano. Mirando cu ta recientemente cu e mandatario a huramenta, e no tabata tin tur cos cla ainda pero a sigura e sindicato y su miembronan cu su porta semper ta habri pa nan.
Nan prome reunion y ya a acorda algun punto. A acorda lo reuni cu mas frecuencia y elabora e puntonan di preocupacion. Por lo menos un biaha pa luna e sindicato y Minister Endy Croes lo sinta cu otro p’asina garantisa cu e veld ta trankilo y cu ambos partido ta traha pa nan manera debe ser. Tin por lo menos dos pa tres punto cu tin mester di atencion mas pronto posibel, di cual SIMAR a trece esaki dilanti tambe ayera durante e reunion. E prome ta e parti di e instructornan di landamento escolar, caminda mas pronto posibel tin cu regla nan posicion huridico.
Tambe e situacion di werksternan di SKOA tin mas di atencion tambe, mirando cu esaki tabata un di e puntonan pakico scol no por a habri na tempo na comienso di aña escolar. Varios punto a wordo entrega y ta spera cu pronto sigui reuni cu e mandatario p’asina hunto cu e veld yega na un miho calidad di enseñansa.
