Tur dia di siman ta dia cu nos tur tin di dedica na nos grandinan, pero awe nos ta celebra Dia Internacional di e Adulto Mayo. Nacionnan Uni a institui e dia aki cu e proposito di concientisa tur hende riba e balor di nos grandinan den nos famia y comunidad. Den tur pais, e componente basico di e sociedad ta e famia y e adultonan mayo mester ta e componente principal di e famia. Ban percura semper pa trata y cuida nos grandinan cu e amor y e respet cu nan merece.
Nos grandinan ta esunnan cu a aporta grandemente na tur loke nos tin awe.
Ta p’esey nos ta sinti nos mes obliga di exigi nos comunidad y gobierno pa duna balor na nos grandinan y respeta nan derecho. E derechonan manera trato cu respet y dignidad, oportunidad real pa sigui participa y por keda activo riba tereno economico social segun nan forsa y deseo.
OPPA ta pidi e gobierno nobo pa cumpli cu e promesanan haci y crea un miho Aruba pa nos tur. Cada un di nos tin e derecho di biba den un mundo husto y yen di harmonia, brindando asina henter nos comunidad un bida yen di felicidad y beneficio. Ta hopi importante pa nos comunidad y gobierno duna e proteccion necesario na momento di crisis, escases, soledad y enfermedad.
Nos ta biba den un comunidad cu ta respeta e derechonan di e ser humano, ta p’esey nos tin e obligacion di exigi nos gobierno pa protega e derecho di su hendenan, mas aun e derecho di nos grandinan. Ta e rol y status di e grandinan den nos sociedad ta indica con desaroya nos pais ta. Nos grandinan a cumpli cu nan debernan y awo ta nos deber di cuida nan y percura pa nan ta feliz den e ultimo fase di nan bida.
OPPA ta gradici y felicita tur Adulto Mayo riba nan dia y muy en especial tur su miembronan.
Nos ta desea nos Grandinan un dia yen di alegria y amor den compania di nan famia.
OPPA
