ORANJESTAD – Departamento di Asuntonan Economico, Comercio y Industria y su unidad Exprodesk ta invita tur negoshi cu ta traha un producto di origen local pa participa y exhibi esakinan riba e webpage di Exprodesk, “Aruba Showcase”. Si bo ta un comerciante local, esaki ta bo oportunidad pa “showcase” bo negoshi y bo productonan.
“Aruba Showcase” ta un pagina ariba e website di Exprodesk unda cu por showcase negoshinan local y pa asina nan haya e oportunidad pa por exhibi nan productonan. Esaki lo bira un plataforma unda cu clientenan potencial lo por mira tur e productonan cu ta di origen local. Pa por considera bo negoshi of producto como ‘di origen local’ tin algun rekisito cu mester cumpli cu ne. E rekisitonan cu ta necesario ta lo siguiente:
- Negoshi local mester ta registra na Kamer van Koophandel (KvK) y tin un vestigingsvergunning di Departamento di Asuntonan Economico, si ta aplicabel;
- Producto mester ta completamente original di Aruba (materia prima y e producto final ta traha/transforma/procesa na Aruba);
- Den caso cu e producto NO ta completamente original di Aruba, e mester ta ‘transforma/procesa’ na Aruba (e materia prima lo por bin di afo pero e producto final mester ta traha/transforma/procesa na Aruba).
Pa registra pa e oportunidad aki lo mester manda un e-mail na: s.meijer@deaci.aw.
Loke ta necesario pa registra ta:
- Un descripcion di e producto (maximo 250 palabra);
- Potret di e producto;
- Informacion di contacto, links di e website y/of Facebook y/of Instagram;
- “Letter of Consent” yena y firma. (Esaki lo manda via e-mail na momento cu registra).
E meta di “Aruba Showcase” ta pa duna negoshinan local e oportunidad pa por crece y exporta na cliente nan rond di mundo cu ta interesa den nos productonan y servicionan local. Asina aki lo yuda e famia di e doño di e negoshinan local y tambe yuda e economia di Aruba.
Pa mas informacion riba e webpage “Aruba Showcase”, y con pa participa, por tuma contacto cu sra. Sharon Meijer via: s.meijer@deaci.aw
