Diahuebs anochi, zona di CONMEBOL a mira accion un biaha mas y atencion tabata riba e wega entre Brazil y Uruguay.
Seleccion di Brazil kende den su ultimo wega a conoce un empate contra di Colombia mientras cu Uruguay a bin di un derota contra di Argentina cu score di 3-0.
Brazil den weganan di eliminatorio pa Qatar 2022 ta demostrando futbol di clase, hungando bon futbol dunando ekiponan dolor di cabez.
E wega a inicia y apenas na di 10 minuut, Neymar Jr. ta duna Brazil ventaha cu un tiro fuerte pa haci e wega 1-0.
Brazil a sigui presiona y na di 18 minuut tabata Raphinha ta haci e wega 2-0 na fabor di Brazil cu tiro fuerte cu a vence keeper di Uruguay.
Brazil a keda pone presion den prome mitar y sigur a desperdicia hopi oportunidad pa anota mas gol.
Prome mitar a bay den descanso cu score di 2-0 na fabor di Brazil.
Den di dos mitar na di 59 minuut tabata Raphinha un biaha mas despues di ricibi un pase tremendo di Neymar Jr. ta anota su di dos gol di wega y e di tres gol di e wega aki pa haci e wega 3-0.
E gol aki tabata identico na un gol di pasado manera Tostao tabata complimenta Pele pa a asina Brazil anota gol den añanan 70.
Luis Suarez ta corta ventaha pa Uruguay cu gol cu a bin di un tiro liber cu a vence keeper di Brazil y asina e wega a bira 3-1 na di 77 minuut.
Na di 83 minuut, Neymar Jr un biaha mas ta cruza e bala dilanti gol y aki Gabriel “Gabi Gol” Barbosa ta cabeza e bala den gol, pero juez di linea ta hisa bandera y ta anula e gol aki.
Aki ta caminda cu VAR a interveni ya cu tur cos tabata mustra cu “Gabi Gol” tabata den posicion corecto y despues di a check esaki e gol a keda conta y asina e wega a bira 4-1 na fabor di Brazil.
Asina tambe e wega a termina cu score di 4-1 na fabor di Brazil kende ta 1 punto for di clasificacion pa mundial Qatar 2022.
Resultado di otro weganan tabata Bolivia ta gana Paraguay 4-0, Colombia y Ecuador ta keda empata 0-0, Argentina ta gana Peru 1-0, Chile ta gana Venezuela 3-0.
