ORANJESTAD – Premier Evelyn Wever – Croes a duna di conoce di a ricibi peticion di parti di comercio pa introduci cambio den e sistema di ‘invoerrechten’ cu Aruba tin aworaki cu ta: Cost, insurance, and freight (CIF) E peticion di comercio ta pa cambia esaki pa: Free on Board (FOB). Si introduci e cambio aki, e gastonan di fleta (freight) no ta bay hunga un rol asina grandi den determina e impuesto cu tin cu paga. Balor di impuesto ta baha y consecuentemente ta paga menos pa e derecho di importacion.
Prome Minister a splica cu desde cu a ricibi e peticion aki 3 siman pasa, a pidi conseho di biaha na aduana riba e tema. Pasobra manera paga menos invoerrechten, un porcion grandi di entrada di Pais Aruba ta bira menos. Teniendo e situacion delicado di Pais Aruba mester ta bon documenta prome cu tuma un decision asina.
“Nos a pidi Aduana e advies sperando cu e lo no tarda pa asina un decision wordo tuma pronto tambe. Ta importante pa sa cuanto e ta bay costa pa haci e cambio aki (di CIF pa FOB) y unabes cu sa cuanto e ta costa lo mester wak con pa haye di otro caminda,” Prome Minister a enfatisa.
Premier a sigui splica cu tin diferente reto na e momentonan aki entre otro cu ainda Aruba su entradanan no ta cubri e gastonan. Turismo mester recupera pa economia por recupera y pa subsecuentemente por mira recuperacion den Aruba su finansas publico. Prome Minster a accentua cu ta compronde e seriedad di e situacion. Alabes lo informa e gruponan cu a haci e peticion pa reunion (Comerciantenan Uni y ATIA), cu ta tratando e tema y ta spera di sinta na mesa pronto pa delibera e miho alternativa.
Banda di esaki Premier Wever – Croes a splica cu ta sigui e desaroyo di prijs di fleta mundial
y ta mira cierto pronostico cu ta indica cu e prijs ta bay baha bek. “Asina cos ta bay semper ora algo subi drasticamente, despues e ta baha un poco te ora cu e stabilisa. Sinembargo, mundiamente ta kere cu e ta bay stabilisa na un nivel mas halto cu prome cu Covid.”
Terminando Prome Minister a splica cu aworaki Gobierno lo mester tuma e decision si ta bay absorba parti di e aumento ey a traves di rebaho di impuesto. Si tabata otro tempo lo por a contesta e gruponan mas facil pasobra lo por a papia cu companianan estatal pa haya mas dividendo pa cera e buraco ey, pero e situacion actual ta hacie mas dificil pa tuma un decision asina lihe.
