ORANJESTAD – Huez den prome instancia a dicta siman pasa conforme exigencia di Fiscal y a impone un castigo di trabao di 30 ora riba dos sospechoso kendenan a menaza Minister-President. E sospechosonan A.B. y G. a haci e menazanan aki riba 29 di december 2020 riba Facebook relaciona cu un conferencia di prensa den cual Minister-President a anuncia medidanan nobo pa cu e situacion di Covid-19 cu tabata reina na e momento ey. Minister-President a haci denuncia di e menazanan aki.
Fiscal di husticia a bisa durante e tratamiento den Corte cu menazanan personal contra Minister-President mester wordo investiga cuidadosamente. Minister-President den su funcion a anuncia e medidanan na interes di salubridad y na interes di Pais Aruba. Semper tin espacio pa critica, pero critica Minister-President ta full un otro cuenta cu menaza Minister-President. Menazanan ta forma un violacion serio riba e sentimento di seguridad di Minister-President y di esnan cu e tin cerca di dje. Pa e motibo aki menazanan ta wordo tuma masha na serio.
