ORANJESTAD – Recientemente Minister di Husticia y Asuntonan Social Sr. Rocco Tjon, a reuni cu Bureau Ondersteuning Verslavingszorg (BOV), un reunion cu practicamente tur e trahadonan, caminda a logra haya un bon splicacion di Director di BOV esta Sr. Steeve Gibbs pa loke a bin ta tuma luga riba e tereno di “verslavingszorg” durante e ultimo añanan, pero hopi importante tambe, kico ta e plannan pa futuro sercano.
Minister Tjon a splica cu durante e reunion aki a logra toca varios tema, a toca por ehempel, e parti di e cooperacion cu pronto lo bay tin entre tur e instancianan cu ta activo riba e tereno di adiccion pa asina nan por traha mas serca di otro, pero hopi importante tambe, a logra delinea algun cambionan cu ta necesario pa asina por sigui mehora e servicio cu ta wordo brinda. E mandatario a reconoce cu Sr. Gibbs tin hopi experiencia riba e tereno aki, y a keda satisfecho tambe di a scucha cu e diferente ideanna cu ta biba na BOV ta coincidi cu e vision di Ministerio di Husticia y Asuntonan Social. Ademas di esaki, a toca tambe e tema di reintroduccion di locual nos ta conoce como “veldwerkers” of “streetcornerworkers”, manera ya a wordo presenta tambe door di otro instancianan, pues ta papia di e “bemoeizorg”, y den cuadro di esaki lo ricibi un plan di accion dentro di poco for di Sr. Gibbs.
Segun Minister Tjon a sigui splica, tin diferente investigacionnan cientifico andando cu a wordo inicia for di aña pasa, pues ta en espera di e resultadonan pa asina den e presupuesto por tene cuenta cu e recomendacionnan pa asina por traha nos maneho a base di evidencia, pues “evidence based policy”, cual na final di dia lo percura pa mehoracion riba e tereno aki como tambe e ayudo cu por wordo brinda. Ademas di esaki a toca tambe e parti financiero y a deduci cu tin hopi fondo disponibel caba pa e tematica aki, na modo cu si logra sincronisa e procesonan mas miho, y si kisas “bundel” cierto subsidionan cu ta wordo brinda hunto, por logra na brinda mihor cuido cual lo beneficia tur esnan envolvi.
Por ultimo, Sr. Gibbs a indica cu e ta sumamente agradecido cu e bishita di Minister Tjon, mirando cu esaki tawata e prome biaha cu nan ta ricibi un bishita di parti di Ministerio, y como tal a keda satisfecho cu a logra delinea e puntonan di enfoke pa e temporanda nos dilanti. Minister Tjon a asegura cu esaki no lo ta e ultimo bishita, pues lo bay bin mas biaha.
