Un feliz dia y luna nobo yena di bendicion y gracia di Dios na abundancia.
”Un multitud grandi a trece nan hendenan lam, mancaron, ciego, mudo y hopi otro enfermo y a pone e hendenan aki na pia di Hesus. Y El a cura nan” (Mateo 15, 30)
Sigur hopi di nos por relata nos mes na e situacion aki; unda cu tin un familiar, un conocir of nos mes ta sufriendo kebrante di salud. Pues laga nos no tarda y tuma e ehempel di e multitud grandi cu a kere y confia den Hesus pa cura nan ser stima. Laga nos tambe pone tur malesa, tur dolor na pia di Su cruz. Pero loke ta mas importante: laga nos busca e sanacion di nos alma. Awor cu nos ta prepara pa celebra e binida di dushi Niño Hesus, pidi’E cura tur loke ta stroba bo curason di por ta un berdadero pesebre pa ricibi’E. Laga nos no lubida cu e enfermedadnan cu ta come nos alma, ta haci mas daño cu e enfermedadnan fisico. Envidia, odia, mal deseo, tur esakinan ta hala nos mas lihe for di Cristo.
Oracion: Cristo Hesus Salbador, Cristo Hesus Sanador nos kier entrega na Abo awe tur enfermedad y dolor di nos famia y di nos mes. Nos ta kere y confia cu Abo ta cura. Pero mas cu tur cos nos ta pidi Bo manda Bo luz di Misericordia y sana tur alma di cualkier impuresa cu ta stroba Bo di tuma Bo luga den nos bida. Amen.
