Un isla Britanico den Caribe di 285 mil habitante, Barbados, a corta laso cu monarchia Britanico cual ta haci cu Reina Elizabeth II di Inglatera, no ta sigui mas como cabes di estado.
Dialuna anochi a tuma lugar e ceremonia di despedida y di instalacion di Barbados su prome presidente, Sandra Mason. Barbados a converti su mes den e Republica di mas nobo na mundo.
E gobernadora Sandra Mason a remplasa e monarchia Britanico como cabes di estado, den forma di presidente. Sandra Mason a yega na e posicion aki, despues cu tanto Gobierno y oposicion a nomina su persona y den parlamento, un mayoria a vota pe, como prome presidente di Republica Barbados.
Barabdos, un isla cu historia di colonia di 400 aña cu Inglatera, na 1966 a bira independiente y a uni su mes cu “Gemenebest van Naties”, “commonwealth”, un coperacion entre 50 pais.
Desde 1966 Barbados a keda mantene monarchia Britanico como cabes di estado.
Sinembargo Barbados a dicidi di sigui su propio caminda, pa cual Inglatera semper tabata cooperativo, y a brinda espacio pa e islanan cana nan propio caminda.
Pa e generacion nobo, Rihana ta nan Reina pa cual Rihana tambe tabata presente na e ceremonia, unda Prins Charles a asisti y a precencia momento cu nan a baha bandera di Gran Britania.
Oposicion na Barbados a critica e hecho aki mustrando cu e momentum, den pandemia, no tabata e momento pa haci e cambio.
Di otro banda tin hopi resentimiento den pueblo pa cu Inglatera, unda Barbados tabata un centro di esclavo y un mayoria den e pais ta sinti cu nunca nan a haya un disculpa.
For di 1627 pa 1807, rond 600 mil Africano a wordo transporta pa Barbados unda nan tabata traha y produci entre otro sucu pa elite Britanico, cu atraves di e negoshi lucrativo aki a sa di yuda mantene nan poder na mundo.
E reclamo ta cu Inglatera nunca a paga un compensacion pa e daño ocaciona.
