15 Sindicato ta dispuesto pa negocia recorte riba beneficio secundario, pero no mas riba salario

Den e manifesto cu 15 sindicato a entrega dia 24 di November na Gobierno di Aruba, durante un manifestacion, por lesa cu sindicatonan no a tuma un postura intransigente den sentido cu “no ta no”, pero nan a habri porta pa delibera cu Gobierno pa mira con por yega na un solucion, pa asina keda dentro di e condicionnan di Hulanda. Den e manifesto cual nos ta publica awe, sindicatonan a bisa tambe cu nan lo no kier accepta mas recorte di salario, pero por papia di otro forma, esta beneficionan secundario. Aki nos ta publica e manifesto cu a keda entrega na Gobierno:

Excelencia,

Pa medio di esaki Federacion di Trahadornan di Aruba (FTA), Sindicato di Empleadonan Publico y Priva di Aruba (SEPPA), Sindicato di Maestronan di Aruba (SIMAR), Sindicato Aduanero di Aruba (SADA), Sindicato di Polis Arubano (SPA), Sindicato di Trahadornan den Telecomunicacion (STT), Algemene Vakbond der Stafleden (ALVAST), Independent Oil Workers Union od Aruba (IOWUA), Sindicato di Controladornan di Casino (SCCA), Sindicato Independiente WEB Aruba (SIWA), Union di Electrisistas di Aruba (UEA), asociacion Vereniging voor werknemers met individuele contracten (VWI) y Organizacion di Pensionadonan Publico di Aruba (OPPA), kier a aserca Gobierno di Aruba cu to siguiente.

Manera cu Sra.Ministro ta na altura di dje, empleadonan publico y semi-gubernamental pa un temporada hopi largo caba ta entregando 12.6% di nan entrada anual.

lnicialmente esaki a wordo haci riba imposicion di Goblerno di Aruba como un acto solidario pa genera entrada pa pago di (entre otro) FASE na esnan cu a keda sin entrada pa motibo di e crisis economico causa pa e pandemia di COVID- 19. Cu tempo sinembargo esaki a wordo converti den un condicion pa ricibi ayudo financiero door di Gobierno Hulandes.

Teniendo na cuenta cu mientrastanto e proposito original pa cu e entrega solidario no ta existi mas, como cu FASE a wordo aboli y cu e motibo cu esaki a sosode ta cu (entre otro segun CFT) tin un recuperation economico satisfactorio, organisacion ariba menciona ta di opinion cu e 12,6% di entrega cu a wordo imponi riba e empleadonan di sector public° y semi-gubernamental tambe tin cu wordo aboli.

E hecho cu Hulanda ta pone esaki como condicion pa duna ayudo financiero no ta haci nos opinion cambia. Esaki como cu ta un hecho cu durante tar e lunanan aki ta varios ta e organisacionnan semi gubemamental cu no a cumpli (totalmente) cu e entrega di e 12.6% y no obstante esaki e apoyo financiero a wordo duna.

E hecho cu Gobierno a indica cu a haci un peticion na Hulanda pa esaki ta 6.3% no ta acceptable pa nos, como cu un bez mas ta fiha un porcentahe sin negocia of dialoga di ningun forma cu esnan kende o mester corta den nan entrada pa por cumpli cu e condicion. Teniendo esaki na cuenta nos ta haci e siguiente solicitud urgente den nomber di tur miembro di nos organisacionnan:

• Pa di forma de imediato aboli e retencion di 12.6% riba e entrada annual di empleadonan publico y semi-gubernamenta pa di e forma aki tur condicion primario y segundario bolbe na normalidad.
• Indica nos por escrito e dia y orario riba cual lo drenta den dialogo y negociacion cu sindicatonan cu como meta yega na un propuesta conhunto riba e forma cu Pais Aruba ta dispuesto pa duna contenido na e exigencia di Gobierno Hulandes pa recorta den gastonan di Gobierno di Aruba, unda cu lo mantene como secuencia reduci gastonan interno di Gobierno na prome lugar, si ta necesario haci ahustenan na condicionnan di trabao secundario na di dos lugar y unicamente si ta altamente necesario y prudente, haci recorte den e beneficionan primario di e empleadonan na di ultimo lugar.
• Nos ta duna Gobierno di Aruba e plazo di un simian pa duna nos un contesta concreto y positivo riba e exigencianan antes menciona.   Den caso cu no ricibi esaki nos lo haya nos ta intensifica accionnan.
• Nos ta spera di no mester yega asina leu y ta confia cu di parti di Gobierno lo compronde cu ta unicamente trahando di forma uni y transparente cu e clase trahador lo logra yega na opcionnan cu ta acceptable pa un y tur.