Minister Rocco Tjon hunto cu Minister Dangui Oduber a anuncia diahuebs mainta cu nan a keda cla cu un solucion pa brandweer. Manera ta conoci, Brandweer ta pasando den momentonan doloroso, unda cu tin falta di hopi material, pa asina por garantisa e servicio.
E solucion ta cu Airport di Aruba, tin e espacio pa asina por duna un financiamento, ora cu ta trata e seguridad di airport y den esaki a habri porta pa por duna un finaciamento na Brandweer.
Minister Rocco Tjon a bisa cu na prome instante a plan esaki como algo a largo plazo, pasobra ta hopi material mester wordo renoba.
Sinembargo, awor cu tin e posibilidad aki, esey lo nifica cu de imediato Brandweer por manda nan peticion aden pa nan equiponan y asina por cuminza pidi nan materialnan. Ta trata aki di un inversion grandi, ya cu Brandweer por manda pidi un canitdad grandi di loke nan falta, incluso truck, etc.
Pa e sindicato di Brandweer, esaki sigur ta un logro grandi. Sr. Rosa a bisa cu nan a tene reunionnan intensivo cu Minister y Management Team y semper nan a keda cu un voz skerpi, pa asina Brandweer por ta bon equipa.
Cu e financiamento aki y cu equiponan nobo, esaki lo trece trankilidad den Brandweer pa e propio personal, pero tambe ta duna un garantia na pueblo y na airport, cu Brandweer lo tin e capacidad pa por cumpli cu e servicio cu pueblo y airport ta spera di dje.
