Diaranson 7 di december, e Prome Conseho di Minister pa Gabinete Wever-Croes II a tuma luga na Nicolaas Store na San Nicolas. Tur Minister tawata presente hunto cu San Nicolas Business Asiociation (SNBA) na unda cu varios inversionista interesa den e desaroyo pa San Nicolas a duna presentacionnan hopi interesante di proyectonan grandi, mediano y chikito cu sigur lo trece desaroyo hopi importante pa Aruba y pa San Nicolas principalmente. Señor Aldrich Croes a splica riba un proyecto turistico cu Gobierno kier bin cu ne riba e tema di Segunda Guera Mundial.
Aruba Amenaties ta un comision cu ta traha riba con por upgrade/mehora e patrimonionan di Aruba y crea un experiencia pa nos hendenan local y bishitantenan. Como parti di con pa crea e ‘orange economy’/ economia creativo rond di e patrimonionan.
E proyecto presenta tabata di Sero Colorado / San Nicolas, cu enfoke riba kico ta e posibilidad pa crea un area of monumento riba Sero Colorado y hacie un patrimonio cu ta trece turista y bishitantenan riba e sero y despues trece nan den ciudad di San Nicolas.
Sr. Aldrich Croes a presenta e potenicialnan di e proyecto cual ta entre otro pa haci e sero un monumento special di e epoca di guera ora cu Alemania a ataca Aruba. Haciendo uzo di e hechonan historico riba e sero caminda cu ainda tin cañon y fundeshi. Mescos cu otro areanan den San Nicolas manera Kustbaterij y refineria. Uzando e factornan aki por crea un tour hunto cu atraccion riba e sero y despues conecta esaki cu San Nicolas.
E proyecto lo haci cu e ciudad riba su mes esta San Nicolas, Sero Colorado y e area, por sirbi e ciudad y pueblo di San Nicolas cu un economia creciente creativo hunto cu su galerianan di arte. Caminda artistanan di Aruba por traha arte, cuadra, pronkstuk/souvenir y bende. Restaurantnan tambe por habri y ricibi e bishitantenan. Pues e ta un proyecto grandi riba su mes cu ta encera varios Ministerio trahando hunto. E comision ta haciendo e trabou ey y aworaki e ta den e fase di presenta e proposicionnan aki na Gobierno.
