Riba mundo tin hopi lider, tin cu ta na bida, y tin hopi cu a muri, pero ta un solo lider tin cu Nace, Biba,Muri, a Resusita y ta sinta na man drechi di Su Tata esey ta Cristo Hesus.
E lider cu ta siña nos tur con pa sirbi otro.
E ta nos Rey y Lider pa semper, den djE nos tin gran confiansa y speransa aunke cu fisicamente nos no ta mire nos sa cu spiritualmente e tey 24/7 pa nos, y tur dia nos lo sigi gradici pa su bondad den nos bida, pasobra nos por depende riba Su gracia y Su favor.
E palabra di Dios ta bisa cu tur rudia mester dobla y tur lenga mester confesa, cu Hesus Cristo ta Señor, y ta pesey tur hende mester tin un bon relacion cu Hesus Cristo , pasobra E ta nos unico speransa.
Cristo Hesus ta bibo y real, y nos tin cu sigi E pa asina evita di cay den idolatria, pesey ora cu Moises a muri Dios a papia cla cu Josue, bisando mi siervo Moises a muri lanta abo pa guia e pueblo cruza e riu Jordan.(Josue Capitulo 1)
Dios no a bisa Josue lanta pa bo sigi haci manera Moises tabata haci , Dios a bisa Josue pa esforsa su mes y sea balente , pasobra mescos Dios tabata cu Moises , Dios lo ta cu Josue.
Cristo Hesus no solamente ta nos lider spiritual, pero den tur area di nos bida e ta presente, pasobra nos mester di Señor tur momento.
E ta nos sanador, E ta nos libertador,E ta nos salbador, nos por depende tur momento riba djE.
E a muri pa nos na cruz y locual nos tin di haci ta kere den djE, pasobra E mes a bisa cu e señalnan aki lo sigi esnan cu ta kere, den Su nomber, pasobra ora bo ta kere den Hesus Cristo ,bo tin e autoridad pa usa su nomber.
Romanos Capitulo 5 vers 8+9 ta bisa: Ma Dios a demostra su mes amor pa cu nos den esaki.Cu tempo nos tabata pecador ainda,Cristo a muri pa nos. Muchu mas anto siendo hustifica pa medio di Su sanger , nos lo ta salba for e furia di Dios door di djE.
Ta door di e morto di Hesus na cruz nos a wordo reconcilia cu Dios, pesey pa medio di gracia nos a wordo salba door di Fe , y esey no di boso mes , e ta un don di Dios.( Efesios 2 vers 8).
2 Corintinionan Capitulo 5 vers 19 ta bisa: Esta cu Dios den Cristo tabata reconciliando e mundo cu su mes,sin tuma nan picanan na cuenta e a duna nos e palabra di reconciliacion.
Tur esaki nan ta prueba dicon Hesus ta nos lider berdadero.
Un ehempel grandi cu Hesus a laga atras pa tur famia , tabata su comunicacion cu Su Tata, aki nan nos tur por siña e berdadero relacion entre tata y yiu, e gran amor , respet y obedencia cu mester ta presente den tur famia..
Cristo Hesus nos unico y berdadero lider.
Sinceramente
Pastor Marcel Balootje.
