Pa su excelente trabounan riba tereno Financiero, Economico y Cultura
ORANJESTAD – Bo Informado a sorprende Minister Xiomara Maduro cu e anuncio di ‘Women Of The Year 2021’. E pagina di noticia social a reconoce e mandatario cu tabata encarga cu e carteranan di Finansa, Economia y Cultura den e prome Gabinete Wever – Croes y actualmente den Gabiniete Wever-Croes II ta responsabel pa e carteranan di Finansa y Cultura, como ‘Women Of The Year 2021’.
Sra. Sharitzka Robles di Bo Informado a bisa cu aña 2021 a habri cu hopi reto y tabata un aña cu mester a tuma e decisionnan corecto na bienestar di Pais Aruba. Pa por a logra esaki Aruba tabatin mester di lidernan cu ta para firme pa tuma decision cu hopi biaha no tabata facil ni tampoco popular, pero e decision cu tabata esun miho pa nos Pais. ‘Nos como media a experienci’e como un mandatario cu ta bisa e cosnan manera nan ta, e no ta sconde e noticianan menos bon. Su decisionnan ta basa riba interes general. El’a demostra di ta traha cu curason y caracter pa su Pais Aruba. Su trabounan ta basa riba bon intencion y e no a scohe pa popularidad. Un mandatario cu un actitud firme, cu tin un vision pa un Aruba unda tur hende por tin un bida digno cu oportunidad pa desaroya nan potencial. Cada paso cu e tuma ta pa cumpli cu su mision pa yuda construi un Aruba financieramente y economicamente stabiel y un pueblo cu ta conserva y ta orguyoso di su cultura’.
Prome cu a dune e reconocimento, e representante di Bo Informado a menciona algun di e hopi trabounan cu e mandatario a desplega riba terenonan Financiero, Economico y di Cultura y despues Sr. Leo Panneflek den nomber di Bo Informado a entrega Minister Xiomara Maduro un plakaat y mas regalo como ‘Women Of The Year 2021’.
Minister Xiomara Maduro ta aprecia e bunita reconocimento aki. E mandatario a bisa cu e ta haci su trabounan cu hopi amor, respet y honor pa Pais Aruba y lo continua di traha duro pa Pais Aruba. E dignatario a gradici Bo Informado pa e honor di a wordo scohe como ‘Women Of The Year 2021’.
