Recientemente director di hospital sr Vroegop lo a duna un entrevista na matutino Amigoe caminda e lo a haci expresionan tocante e vacuna.
E lo a bisa y mi ta cita:
“Segun mi, awo ta reconoce ampliamente cu diferente vacuna di Covid-19 ta proteha nos menos contra e infeccionnan di loke tabata pensa anteriormente”
Un statement haci asina pa un director di hospital no ta na su lugar y ta incorrecto.
E estadisticanan cu e propio director ta comparti cu ministerio di salud ta contradeci su ponencia totalmente y pesey ta incomprendibel con e director di nos hospital cu mester por sa mihor ra expresa su mes di e forma aki.
Segun e datosnan cu e mes a comparti cu ministerio di salud a keda demostra cu di tur esnan cu a wordo hospitalisa sea den e unit di covid of den ICU cu covid-19 desde 1 juli 2021, 80% di nan NO tawata vacuna. Awor con bo kier bisa cu e vacuna ta proteha nos menos si 80% di esnan interna NO tawata vacuna! Acaso e mes no ta tuma nota di e informacion cu e ta comparti cu ministerio di salud? Sigur como minister mi ta lamenta expresionan haci aki y ta mas cu na su lugar pa e expresionan aki wordo corregi pa evita cualkier malcomprondemiento tocante e vacuna.
Como gobierno y minister di salud semper nos a bisa cu e vacuna ta dunabo e proteccion cu ta evita cu un persona ta corre mas risico di wordo hospitalisa. E vacuna ta minimalisa e risico.
Nunca nos a bisa cu e vacuna ta bai evita cu bo por wordo contagia.
Tur estudionan haci rond mundo ta mustra cu e vacuna a duna resultado y aki na Aruba tambe esey ta e caso.
Nos por mira tambe actualmente cu tanto caso activo na Aruba cu hospital su capacidad ta keda bao di control.
