Discurso di Prome Minister riba Dia di Betico:
Diamars 25 di januari, nos pueblo a celebra Dia di Betico, e aña aki atrobe, na un manera diferente. Na un manera diferente pasobra Covid ainda ta presente riba nos isla y mester tene cuenta cu e reglanan existente. Sinembargo, ta importante pa celebra e fecha natalicio di un gran politico di nos pais. Den su discurso durante e acto protocolar pa duna homenahe na señor Betico Croes, Prome Minister Evelyn Wever-Croes a haci un pregunta hopi importante pa nos pensa riba dje. Kico Betico Croes lo a haci den e situacion cu Aruba ta aden awo?
Den e dos añanan aki di pandemia global, caminda nos a mira nos economia cay y nos autonomia tabata bou presion, hopi biaha ta bin na mente e pregunta: Kico Betico Croes lo a haci si e tabata den e posicion aki. Ki decision e lo a tuma. Con e lo a atende cu e situacion?
Betico tambe lo a scoge pa acepta e ayudo di Hulanda, bou condicionnan, contal cu nos pais no kibra? E ayudo cu ta permiti nos reconstrui nos economia, pa nos crea un economia mas fuerte y resiliente.
“Mi no tin contesta riba e preguntanan aki, pero un cos si mi sa. Betico Croes lo ta hopi orguyoso di su pueblo, e pueblo cu e a sa di uni den un solo ideal: haci di Aruba un pais y cu awor ta uni pa saca nos pais di e abismo cu e pandemia Covid a hinca nos aden.
Betico lo ta orguyoso di nos frontliners cu ta haciendo un trabou grandi den cuido di nos pashentnan y nos grandinan y den mantene orden publico. Betico lo ta orguyoso di nos ciudadanonan cu boluntariamente ta saca man pa yuda otronan. Orguyoso di tur e boluntarionan cu ta yuda esnan mas vulnerabel di nos pais. Orguyoso di tur esnan cu a haci hopi sacrificio den e pandemia aki. Mescos cu mi, mi ta sigur cu e tambe lo ta hopi orguyoso di tur esaki”, Prome Minister Evelyn Wever-Croes a expresa.
Prome Minister a enfatisa e hecho cu Covid a dal nos dushi Aruba duro. Pero nos pueblo lo enfrenta y surpasa e reto aki tambe. Sigur inspira pa e lucha pa Status Aparte di nos pais cu Betico Croes a realisa, e biaha aki tambe, nos tin e mesun determinacion, y perseverancia y uni den amor pa nos pais, pa lanta, gara e bandera y sigui cu e lucha.
“Talves nos tin cu dal algun paso chikito atras, pa despues sali dilanti cu pasonan grandi, pa un economia mas fuerte, cu un autonomia mas fuerte, pa un Aruba mas fuerte. Y nos a yega di pasa den esaki caba. Prome cu nos a drenta nos Status Aparte dia 1 di januari 1986, Lago a cera su porta. Cu esaki e tempo ey Gobierno a perde gran parti di su entrada, mescos cu awor. E tempo ey nos a wordo inspira pa Betico, cu determinacion, perseverancia y union, nos a enfrenta e retonan y surpasa nan. Mescos nos lo haci awor. E unico diferencia ta cu Betico Croes no ta fisicamente cu nos mas awor”, Prome Minister Evelyn Wever-Croes a expresa.
Kico Betico lo a haci? Un biaha mas, Betico lo a lucha pa nos pueblo, cu mesun fe, determinacion, perseverancia pa uni nos pueblo, mescos cu nos Prome Minister Evelyn Wever-Croes y Gobierno di Aruba, nos profecionalnan y nos pueblo en general a haci y ta haciendo den e tempo dificil cu e pandemia a causa nos.
