E ultimo dos añanan henter mundo a pasa den un situacion extraordinario y sumamente dificil. Nos tur sa cu pa hopi aña nos dilanti, nos, y nos futuro generacionnan, lo ta pagando ainda pa supera e daño financiero y social cu e pandemia aki tabata tin ariba nos pais.
Aunke awo e pandemia no a pasa ainda, poco poco nos ta bayendo bek na un “normal” nobo y nos economia ta recuperando atrobe. Asina mes ainda tin trahadornan cu tin cu entrega parti di nan salario. Un grupo cu ta bringando e situacion aki intensivamente, ta e maestronan. E maestronan tin lunas bringando nan caso, y diasabra cu a pasa un articulo a sali den medionan cu pa compensa nan recorte di salario, nan lo kier introduci un orario nobo na februari awo, na unda cu e muchanan lo ricibi un ora menos di les tur dia.
E situacion aki ta wordo mira como alarmante door di algun mayor, y specialmente Sr. Marald van Montfoort kier a expresa su preocupacion y wak si tin un manera cu nos lo por bin cu un otro solucion pa e reto nos dilanti. ”Como mayor y ciudadano di e pais aki mi ta compronde ful dicon e maestronan ta disgusta. Nos standard di bida ta depende completamente di e salario cu nos ta custumbra di haña tur luna. Banda di esey e costo di bida ta keda subi y nos tur tin e derecho di wordo paga pa e balor y calidad di trabao cu nos ta provee. Den e caso aki, e maestronan ta esunnan cu ta precura pa e enseñansa y educacion di nos muchanan, cual tin un balor inmensamente grandi”, Marald ta comparti.
“Di otro banda, durante e pandemia nos muchanan a sufri di un retraso den enseñansa inmenso. E consecuencianan pa e situacion social na nos pais tambe ta hopi grandi, sin papia di e consecuencianan cu tur esaki tin ariba e economia di nos pais. Te ainda mi mes no sa con e mayornan cu ta traha den e sector turistico a logra supera e momento dificilnan aki, pero mi miedo ta cu hopi mucha chikito a keda nan so na cas, paso mayornan no tabata tin otro manera.” Marald ta continua. “Pa cambia e orario di scol pa 1 ora mas laat of pa caba un ora mas tempran, den asina corto plaso, tin consecuencianan grandi pa henter nos comunidad. Tur e orarionan di scol ta mara na e orarionan di trabao di mayoria di persona”, Marald ta nota y ta continua;
“Ami ta sinti cu anos como mayor no ta wordo envolucra den busca un solucion, mientras cu anos ta mastanto esunan cu despues lo carga cu e consecuencianan. Pasobra ta ken lo mester regla pa e muchanan wordo busca of pa nan haña cuido pa e oranan cu no tin scol? Nos como mayor, por yuda den un manera of otro pa contribui den sea pa aporta cu fondo of bin cu ideanan creativo pa cualkier medida por ser implementa cu exito”.
Locual Marald ta propone ta lo siguiente: “Nos kier wak cuanto draagvlak tin entre mayornan pa contribui cu algo extra. Nos yiunan y e futuro di nos pais ta demasiado importante. Ban traha hunto pa busca un solucion. Laga nos sa si boso lo ta dispuesto den forma parti di e accion aki y “sign up” ariba www.facebook.com/huntopaeducacion. Si nos sa cuanto hende ta dispuesto pa duna sosten na e movemento aki, nos por tuma pasonan pa busca un solucion hunto cu e sector di enseñansa.” Marald ta termina.
Pa bin cu un solucion pa e problema aki no ta facil. Pero nos tur tin cu ta conciente di e situacion precario aki y realisa cu cualkier decision cu wordo tuma lo tin consecuencianan grandi ariba e bienestar di nos muchanan, e mayornan, e comercio, nos comunidad y nos futuro.
