Diamars den careda di 5’or di atardi, coleganan di un dama a bati alarma na polis.
E coleganan tabata preocupa pa motibo cu pa tres dia caba nan no sa di nan colega. Nan tabata hopi preocupa pa su bienestar.
Aparentemente nan lo a puntra e pareha di nan colega p’e y e homber na su turno lo a mandanan un potret di e dama basta maltrata, wowo y cara full blousia y lip kibra.
E coleganan a avisa polis y polis na su turno mesora a mobilisa pa bay drenta den e cas na Madikikavel caminda e homber lo tin e muher wanta.
Polis mesora a prepara pa bay drenta e cas y libera e muher cu lo tabata cera den e cas contra su boluntad.
Net na e momento ey, e homber a hinca e dama den un Suzuki Swift blanco numera A63980 y a bandona e cas, nan a bay direccion pariba.
Den algun minuut polis a topa cu e Suzuki Swift na Ponton, na altura di e rotonde di Watty Vos Boulevard. Mesora nan a para e auto. E polisnan a papia cu e homber y e dama.
E auto su documentonan no tabata na ordo y e homber no tin rijbewijs tampoco. E la keda deteni pa core auto sin rijbewijs. E la wordo transporta pa warda di polis.
E dama cu a wordo severamente maltrata pa e homber, no kier a entrega keho di maltrata.
Ambulance a presenta na e sitio pa atende cu e dama, mirando cu su cara tabata hopi blousia.
E auto a keda confisca, pasobra niun documento no ta na ordo.
No ta conoci cu despues di un rato e dama lo por a cambia di idea y toch entrega un keho di maltrato, ta hopi golpi e dama aki a ricibi di su pareha y golpinan basta fuerte den su cara.
