E economia di Aruba ta mustra di tin un recuperacion rapido. E expectativa ta cu turismo e aña aki ta bolbe na su nivel anterior prome cu e periodo di Corona virus. Ta necesario pa Aruba tuma awo e medidanan pa reduci drasticamente e deficit significativo den 2022 y logra un surplus pa aña 2023. Esaki ta necesario pa reduci e debe publico, cu na final di aña 2021 tabata na AWG 5,7 miyar. E reduccion di gastonan di Gobierno y e reformanan cu lo aumenta e potencial di crecemento di e economia, ta esencial. Muy particularmente mester bini cu medidanan structura pa reduci e gastonan di personal.
Presupuesto di 2022 y 2023
E recuperacion di turismo segun e ultimo datonan ta progresando mas rapido di loke a spera. Segun e ultimo pronosticonan, den 2022 turismo ta alcansa e nivel cu e tabata tin na aña 2019. Cu e recuperacion rapido aki di turismo, e economia tambe ta recuperando na un manera prospero. Esaki mester keda refleha den e presupuesto di e pais. E concepto di ley di e presupuesto pa aña 2022 ainda no a keda presenta na Parlamento. Como resultado, e Gobierno no tin e mandato ainda pa implementa e presupuesto. E concepto di ley di e presupuesto ta inclui un deficit significativo di e pais di AWG 286 miyon. Esaki lo significa cu e debe di Aruba tambe ta aumenta substancialmente e aña aki. E gastonan di interes di e aña aki ta subi na AWG 261 miyon. Historicamente esaki ta un nivel halto sin precedente. Hopi importante ta pa limita e gastonan e aña aki. Pa reduci e debe publico, cu actualmente ta AWG 53 mil pa persona di e poblacion di Aruba, ta necesario pa realisa un surplus presupestuario iniciando den aña 2023. Pa logra esaki, ta inevitabel y di suma importancia pa tene e gastonan publico bou di control. Ta di suma importancia pa reduci e gastonan di personal cu na aña 2022 ta na mas di 35 prociento di e ingresonan. E gastonan na producto y servicio tambe mester keda reduci. CAft ta conseha Aruba pa presenta e concepto di ley di e presupuesto na Parlamento mas pronto posibel cu un deficit k uta significativamente menos.
Control riba subsidio di salario
Un control di supervision di subsidio di salario a mustra cu pa e añanan 2020 y 2021 a resulta cu e perdida di entrada cerca companianan tabata menos cu a spera. Esaki ta significa cu den e añanan menciona a propociona demasiado subsidio di salario. E companianan mester paga AWG 108 miyon bek. CAft ta considera positivamente cu SVB casi a conclui su control di supervision di e subsidio di salario pa e aña 2020 y 2021. CAft ta impone cu e cobramento mester keda haci mas rapido posibel, di lo contrario e riesgo cu bo no por cobra e placa bek ta bira mas grandi.
E reformanan
E reformanan den e “Landspakket” ta esencial pa stimula e crecemento economico. Aruba tin e intencion di implementa e reformanan fiscal cuminsando e aña 2023. Debi na e falta di informacion di e plan di reforma di impuesto, CAft no por evalua si e calculacion inclui den e presupuesto ta realistico. CAft ta haci su mes e pregunta con e reforma fiscal di impuesto y e peso di e aumento di impuesto lo influencia e presupuesto y ki consecuencia e lo tin riba e crecemento economico. Ta di suma importancia pa restringi e gastonan di Gobierno den e presupuesto pa asina tin espacio pa acomoda e reforma fiscal.
E reformanan riba tereno di seguridad social y di cuido ta necesario pa garantisa sostenibilidad di e sistema pa futuro generacionnan. Gobierno a anuncia medidanan concreto manera contribucion propio y un lista positivo pa yuda baha gasto den cuido di salud. Ta esencial cu e medidanan aki wordo introduci den un tempo cortico. Bahada di e gastonan ta e prome paso den direccion di un cuido medico sostenibel y mester garantisa cu e pais Aruba riba termino cortico no mester cubri e deficit den AZV.
CAft a realisa un bishita virtual na Aruba dia 17 y 18 di februari 2022. A hiba combersacionnan cu, entre otro, Gobernador, e ministro di Finansa y Cultura, e Conseho di Ministro y Comision di Finansa, Cultura y Deporte. Ademas, CAft a papia cu e gerensia di Departamento di Impuesto, Aruba Tourism Authority y e Organo di Ehecucion di Seguro Medico General (AZV).
