Tres dia celebrando nos cultura riba un Plaza Libertador Betico Croes yena di hende, cu tentnan ofreciendo cuminda crioyo, boca dushi y mucho mas. Un stage caminda nos por a experencia un showcase di talento y creatividad cu ta yena bo cu orguyo. Sin laga afor letranan yena di amor, pasion y aprecio pa nos pais y su hendenan acompaña pa melodianan tipico cu ta un caricia pa e orea. Ay si, e show y ambiente aki sigur a haci hopi falta!
Como Parlamentario mi kier a yama pabien na un y tur cu a participa na e Concierto Cultural Nacional cu a tuma lugar diabierna ultimo y tambe na e Festival Un Canto pa Aruba categoria Infantil – Hubenil y grandi 2022 cu a tuma lugar riba diasabra y diadomingo ultimo. Mas cu claro mi mester felicita e comite organisado di ambos actividad cu tabata hopi exitoso. Mirando e cantidad di hende cu a asisti y interes bou di nos hendenan pa un tent pa bende cuminda, artesanĂa etc ta asina grandi, sigur nos por anticipa riba un celebracion di nos DĂa Nacional na un manera fenomenal atrobe. Algo cu mi ta kere nos tur tabata anhela.
Mi kier a felicita specialmente e ganadornan di e Festival Un Canto pa Aruba, su Himno y Bandera categoria Infantil – Hubenil cu a tuma lugar diasabra ultimo cualnan ta Qu-Lainey Jansen, Jaymerson Kelly, Ishem Howell-Brokken, John-Maynard Wever, Stephanie Quant, Jorienne Angela, Daniella y Gabriella Boasman y Gismary Linarez.
Alabes mi kier a felicita e ganadornan di categoria adulto di e Festival Un Canto pa Aruba, su Himno y Bandera cu nan tremendo show y presentacion dedica na nos dushi isla y su hendenan cualnan ta Ruth Gaarie & Stephanie Gravenhorst, Mitch Almary y Jerwin Hernandez.
Un pabien special na tur compositor, areglista y banda pa nan tremendo aporte, talento desplega y creatividad un biaha mas demostra. Aruba berdaderamente tin hopi talento.
Mi kier a gradici un y tur cu a asisti na e tres anochinan aki y a hacinan exitoso. Nos a berdaderamente celebra nos cultura en grande e fin di siman tras di lomba. Pabien Aruba!
