Relaciona cu Celebracion di Dia di Himno y Bandera 2022, diamars mainta Minister di Cultura Sra. Xiomara Maduro a bishita Scol Basico Pius X na Dakota. E mandatario a haya un bunita recepcion di parti alumnonan y team di docente di e scol. Cabesante di scol a duna un bon bini y Himno di Aruba, “Aruba Dushi Tera” a ser canta pa e muchanan di scol. Despues Minister Xiomara Maduro a bishita e klasnan pa asina admira e obranan traha pa e muchanan enconexion cu Dia di Himno y Bandera. A resalta e creatividad di nos muchanan e.o. obranan di man di lugarnan conoci riba nos pais, nos pasa bocanan, nos biyetenan cu nan bunita pinturanan.
Minister Maduro a combersa cu e muchanan y a motivanan pa sigui stima nos pais cu mente y curazon. Tambe a invita tur muchanan pa celebra nos Dia di Himno y Bandera, pa hunto den famia bishita e actividadnan, hisa bandera di Aruba na cas, pone banderin na auto pa asina celebra nos dia di Himno y Bandera na grandi yen di amor. A recorda e muchanan pa participa den e programa na Television Kibra Coco, Edicion Himno y Bandera cual lo tuma luga diasabra awo cuminsando pa 5 or atardi na canal di television, participa y gana premio pa bo mes, bo famia y bo klas. E team di docente y muchanan a keda masha contento cu e bishita di e mandatario encarga cu Cultura. Na final Minister Xiomara Maduro a gradici y staf y muchanan pa e rato ameno y a deseanan nan tur Un Feliz Dia di Himno y Bandera.
