Den cuadro di World Down Syndrome Day minister R. Tjon di Husticia y Asunto Social a hasi un bishita na Stichting Ambiente Feliz.
Stichting Ambiente Feliz ta consisti di dos localidad. Localidad Cas Curason ta situa na Santa Cruz y ta ofrece vivienda na persona adulto cu un limitacion mental. Localidad Cas Briyante ta situa na San Nicolaas y ta ofrece vivienda y pasa dia na persona cu limitacion multiple cu ta rekeri cuido intensivo.
Durante e bishita di minister Tjon e fundacion a brinda e oportunidad na minister pa ser conoci cu ambos localidad. Na Cas Curason a presenta un video na unda minister a haya sa un tiki di e historia di e fundacion y e servicio cu e fundacion ta ofrece. Sigui pa un quiz chikito cu e tema di Down Syndrome na unda minister, cu ayudo di 1 cliente, mester a contesta 4 pregunta. Despues minister a ricibi un rondleiding na ambos localidad na unda e trahadonan mes por a splika un tiki mas di e trabou importante cu nan ta eherce na bienestar di e clientenan. A para keto ariba e desafionan cu nan ta enfrenta den na trabou y e necesidadnan cu tin. Durante su bishita na e pasa dia di Cas Briyante, minister por a admira con e clientenan ta wordo activa durante dia. E pasa dia, cu ta un colaboracion cu Bipito Pin di SVGA, ta brinda e clientenan di Cas Briyante y clientenan ambulante (cu ta biba na cas) e oportunidad pa participa, desaroya y socialisa.
Bestuur y directora di Ambiente Feliz a sinta cu minister Tjon y su beleidsmedewerker. A enfoca ariba e situacion financiero actual di e fundacion y e necesidad grandi cu tin pa mas subsidio structural. E fundacion a presenta varios projecto cu e ta desea di ehecuta, manera e mantencion y expansion di e localidad na Santa Cruz. E projecto tin como meta pa mehora e calidad di vivienda actual y brinda mas persona cu un limitacion mental e oportunidad pa ricibi e cuido y guia necesario. Bestuur a propone pa jega den un temporada defini na un Memorandum of Understanding (MOU) cu bureau di minister Tjon pa asina concretisa e colaboracion cu minister y su staf den e proximo añanan.
Si ta desea por hasi un donacion na e cuenta di CMB bou nomber di Stichting Ambiente Feliz. Number di cuenta: 20906501. Masha danki!
