Women’s Club of Aruba (WCA) ta organisando un BINGO pa recauda fondo pa Dress a Child, cu ta nos proyecto anual di fin di aña. Dress a Child ta nos ‘signature project’, cu ta e proyecto di mas grandi y importante cu nos tin. Na 2021 nos a bisti 270 mucha entre 0 cu 10 aña pa e temporada di Pasco, dunando asina un ayudo enorme na e famianan, cu ta bin na remarca pa esaki. Cu apoyo di nos comerciantenan local di Super Shopping, Gee Kay Department Store, Giselle Department Store, La Aruba, Dowco, Ke Ke Mega Mart y Salinas Department Store, cu ta duna nos un descuento generoso, nos ta logra cumpli cu meta di e bunita proyecto aki.
Pa nos por logra yega na e fondonan desea, nos ta organisa e BINGO hunto cu e famoso Rupi Rupi di Caribbean Bingo y Fundacion Pro Cultura. E Bingo lo tuma luga riba diadomingo 10 di april pa 1:00 pm y lo wordo transmiti “live” via Canal 22, Facebook page di Caribbean Bingo y via radio emisora Top FM 95. E bukinan pa e wega ta obtenibel cerca tur miembro di WCA pa e suma di awg.10.00. Pa buki por tuma contacto tambe cu e facebook page di WCA y pa mas informacion y of pedido di buki por tuma contacto cu nos via cellular:7332020. Cu gusto nos ta ofrece servicio di entrega.
WCA ta invita un y tur pa pasa un rato ameno hungando BINGO den grupo di amistad of famia, cu chens di gana bunita premio y alabes cooperando cu nos club pa recauda e fondonan necesario pa nos por sigui yuda den comunidad.
Prome cu e wega cuminsa Caribbean Bingo lo duna tur instruccion y regla. Y mescos cu tur otro wega, e hungado di Bingo tin cu yama den aire pa verifica e Bingo ganado!
