Continuacion di actividad den Semana Santa na misa “Inmaculada Concepcion” Santa Cruz
Despues di celebra Hesus su entrada triunfal riba Diadomingo di Rama, aki ta sigi un invitacion di Pastor Jairo Maduro y Pader Jose M. Nava pa sigi cu animo e proceso di combersion na Dios. Laga Hesus drenta e tempel cu ta bo bida, bo Herusalem y cuminsa un bida nobo.
Diarason, 13 di april – 7:00 pm Misa Crismal na Pro-Catedral San Fransisco, celebra pa Mgr. Luis A. Secco y con-celebra pa tur Pastor di Aruba. No tin misa na otro parokia.
Mgr. Secco lo consagra azetanan pa bautismo, confirmacion, sacramento di enfermo y sacramento di orden sacerdotal pa uso den e aña liturgico aki.
Bin reza pa tur e Sacerdotenan di nos Isla cu lo renoba nan promesa sacerdotal durante Misa Crismal.
Diahuebs, 14 di april – Diahuebs Santo Conmemoracion di ultima cena di Señor.
7:00 pm Celebracion Eucaristico. Lo celebra e misterionan di Institucion di Santa Eucaristia, Orden Sacerdotal y Cristo su mandamento di stima otro. Despues di predicashi tin labamento di pia. Despues ta sigi cu Adoracion te 10:00 pm. No laga Hesus su so den su agonia.
Diabierna, 15 di april – Diabierna Santo Conmemoracion di sufrimento y morto di Señor.
5:00 am Caminda di Cruz di bario di Santa Cruz. Ta sali for di parking lot pariba di misa y lo pasa den Macuarima, Papilon y caba pabou di misa. Ta gradici e 14 famianan cu a pone nan cas disponibel pa resa un stashi. Ta haci un yamada na tur parokiano pa tuma parti na e Caminda di Cruz den bario pa medita riba Hesus su ultimo dia riba mundo.
8:00 am Caminda di Cruz di Mama Maria den Ser’i Noka. Bin cana hunto cu Mama di Hesus, y mira pa medio di su wowonan, loke Hesus a pasa aden riba Su caminda pa Calvario.
10:00 am Caminda di Cruz den misa pa muchanan. Laga e muchanan siña e bunita tradicion catolico.
2:30 pm Lectura di 7 palabranan di Hesus pa Pader Jose M. Nava. Na cruz claba, Hesus a papia shete bez. Ban hunto medita riba e palabranan aki.
3:00 pm Conmemoracion di Pasion y Morto di Señor. Lectura di Pasion di Señor y Adoracion di Cruz.
5:00 pm Nobena na honor di Divina Misericordia
Diasabra, 16 di april – Diasabra di Aleluya/Vigilia Pascual
8:00 pm Bendicionamento di candela, bela di Pasco, awa pa bautismo y bela y awa cu fielnan trece den botter, renobacion di Promesanan Bautismal y Celebracion Eucaristico.
Diadomingo, 17 di april – Pasco di Resureccion
8:00 am – 10:00 am – 12:00 merdia (na Spaño) – 6:30 pm Celebracion Eucaristico
Dialuna, 18 di april – Di dos dia di Pasco di Resureccion
9:00am Celebracion Eucaristico
Masha danki pa tur cooperacion. Fraternalmente,
Pastor Jairo Maduro Pader Jose M. Nava
Pastor di Parokia Vicario Parokial
