Manera nos a bin pa publica anteriormente cu pa tene na cuenta cu e uzo di awa di dam ta pa motibo cu nos di Departamento di Agricultura,Cria y Pesca a premira cu nos damnan rond Aruba for di basta tempo no tabata bon yena cu awa. For di algun aña caba cu Aruba no a haya un yobida torencial pa yena e damanan rond Aruba completamente. Ta simplemente algun yobida no suficiente y sporadicamente. Automaticamente ta hasi cu e poco awa cu e damanan tabata tin no lo tabata suficiente pa por tin un duracion largo na momento di secura. Esaki ta hasi cu na e momentonan aki hopi di e damnan aki ya ta bashi y no tin awa pa nos por abastece nos agricultornan cu ta hasi uzo di e awa di damnan aki.
Momento a yega pa Departamento di Agricultura, Cria y Pesca Santa Rosa tuma e decision pa cuminsa sera damnan cu no por wordo uza mas debi cu esakinan ya ta bashi y no tin awa. Ta simplemente e lodo den fondo a keda cual por hasi esaki t peligroso pa esnan cu yega serca tanto persona of bestianan cu kier bebe awa.
Lo tuma algun tempo pa e lodo aki seca si dado caso awa no yobe pa Santa Rosa por cuminsa hasi e damnan encuestion limpi. Cu e lodo cu tin nada no por wordo hasi.
Nos ta hasi un apelacion pa tene cuenta cu mayoria damnan lo wordo sera pa no crea peliger. Mientras tanto e pos di awa dushi na Savaneta y Pavia ta keda den funcion mientras cu tin awa. E dam di Tankileendert y e dam di Rooiafo lo wordo sera di tal manera cu ta pick-up so por pasa pa coi awa pa e cunukero cu tin mester.
Departamento di Agricultura, Cria y Pesca Santa Rosa ta hasi un apelacion pa tene na cuenta e cambionan aki cu ta na bienestar di nos Sector Primario.
Sea creativo riba resevanan di awa
Dado caso cubo por tin espacio pa ta mas creativo riba reservanan di awa pa e temporada aki cu no tin suficiente awa di dam nos ta consehabo pa tira un bista riba esaki. Check bo airconan na cas di e awa cu e ta produci si bo por colecta esaki. Bo Wash Machine tambe hopi biaha e awa aki ta bai perdi. Check esaki tambe si bo por colecta e awa aki. E habon cu ta den e awa of e habonnan cu ta wordo uza awendia mayoria biaha nan ta “Biodegradable”. Esaki ta nifica cu e habon na monento cubo tire den e awa pa laba e pañanan ta na e momento ey so e tin efectividad. Na momento cu e awa aki bai afo, of den tira esaki no ta causa ningun daño mas. Kiermen bo por uz’e riba bo matanan. Nos ta desconseha si y cual ta prohibi tambe pa uza awa di pos riba bo matanan. Esaki no por wordo hasi.
Sea mas creativo y wak si berdad bo por ta mas conciente den uzo di awa y colecta for di unda cu por colecta.
“Awa ta Bida”
