Comerciantenan di Caya ta pido auxilio: haci algo cu e fontein

Ta poco pais por tin un fontein multifunccional asina, manera cu tin den Caya Betico, pariba di Penha.

Gobierno (Dow) ta gasta capital di awa pa luna pa un fontein, cu enbes di embeyece e caya, ta bira un fuente pa mal ambiente.

Adictonan ta usa e awa aki pa baña, pa laba nan paña y e mes awa nan ta bebe como tambe paloma, y despues e mes awa aki ta wordo usa pa adictonan haci carwash den e parkeo partrad di Penha.

Un situacion inhygienco total, cu mas bien enbes di a crea algo bunita, a bira molester y ta crea un panorama mahos.

Cuanto placa ta wordo gasta na awa? Y pa ken?

Ta yega ora cu DOW, Gobierno, y esnan encarga mester por atende tipo di situacionnan asina aki y busca forma pa remedia e situacion.

Caya Betico ta blo bashi, pa exactamente e hecho cu e fontein aki ta sustene e adictonan, cu ta terorisa e clientenan.

Pues, e fontein ta hasta fuente di nan entrada di laba auto, y si bo no laga nan laba auto, nan ta capas di bringa tambe.

Sin menciona cu nan ta laba bo auto sin puntra y ta exigi pago ora bo regresa bo auto.

E prome paso ta pa elimina e fontein aki temporalmente. E no ta nada, pero nada bunita pa mira adictonan suno baña aden, laba paña, y bebe di dje tambe.. etc etc.

Comerciantenan precipa a contacta SOLO DI PUEBLO ta pido ayudo di Dow y Gobierno, pa cuminza pone ordo, control y seguridad rond di Caya.